Qırımtatar uquq qoruyıcısı Emir-Üsein Kuku ve Rusiyeniñ Başkortostandaki cezahanesinde tutulğan diger qırımlı mabüsler profilaktik esapqa alındı, dep bildirdi Kukunıñ ömür arqadaşı Meryem.
«Salavat şeeri cezahanesiniñ müdiriyeti onı tüzetüv müessisesiniñ hadimine ücüm etmege azır olğan birisi ikibi profilaktik esapqa aldı. Ne içün esapqa alındı, bunıñ içün bir sebep berdimi, hadimlerge nisbeten onıñ tarafından aqaretler, ücüm ıntıluvları barmı suallerge - şahsen oña iddialar yoq, dediler. Kurgan cezahanesindeki öldürüv sebebinden FSİN reberliginiñ qararı ile 205 maddege binaen qabaatlanğanlarnıñ siciline satır berile», – dep haber etti qadın Facebookta.
Onıñ malümatına köre, profilaktik esapqa aqayı ile beraber cezahanede tutulğan bütün Qırım musulmanları alınğan.
«O, bunıñ artıdan cezahaneniñ hadimlerine qarşı iddia etilgen bir ücüm ve yañı mahkümiyet ile kerçek provokatsiyanen neticelene bileceginden qorqa. Ayrıca, böyle profilaktik esap, sert apis şartlarına ya da tek kamera sıfatındaki odağa çıqarılması içün esas ola bile. Bundan ğayrı, böyle makhümler mahsus telükesizlik tedbirleri ile avuştırılalar, daa olar müddetinden evel azat olunma ve cezalarını çekme şartlarınıñ yımşatılma fırsatından marum etile», – dep qayd etti Meryem Kuku.
«Memorial» aq qorçalayıcı merkezi Emir-Usein Kukunı siyasiy mabüs dep tanıdı. 2020 senesi dekabr ayında onı Levko Lukyanenko Ukraina devlet stipendiyasını alması içün namzet köstergenler.
Emir-Usein Kuku – qırımtatar aq qorçalayıcısı ve faali. 2019 senesi noyabrniñ 12-nde Rusiyeniñ Cenübiy okrugınıñ arbiy mahkemesi onı «terror teşkilâtınıñ faaliyetini teşkil etkeninde» qabaatlap, 12 yılğa üküm etti. Amnesty International Kukunı vicdan mabüsi dep saya.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
