Moskva şeer mahkemesi (Rusiye) Qırım sakini İvan Yatskinniñ tevqif müddetini daa eki ayğa uzattı – 2021 senesi aprelniñ 16-nace. Bu aqta Qırım.Aqiqatqa advokat Nikolay Polozov haber etti.
Özü Polozov mahkeme oturışında iştirak etmegen.
“Evel, tahqiqtaçığa oturışta olmaycağım aqqında habername yollağan edim. Qırımda, Ermen Bazar şeerinde diger mahkeme oturışında bulunacağımnı haber etken edim. Amma neçündir mahkeme oturışını başqa künge qaldırmadılar. Menim iştiragim olmadan keçirildi. Mahkemede Ukraina konsulı da yoq edi. Añlağanıma köre bu mahkeme oturışında tayinlengen advokat edi. Elbette qararnı temyiz etecekmiz”, – dedi Polozov.
Жизнь семьи крымчанина Ивана Яцкина после его ареста (фотогалерея)
Evel Moskvadaki birinci istinaf mahkemesi Qırım sakini İvan Yatskinniñ tevqif müddetiniñ uzatılmasına qarşı berilgen istinaf şikâyetini red etti.
Moskva şeer mahkemesiniñ mahkemecisi Oleg Muzıçenko Qırım sakini İvan Yatskinniñ tevqif müddetini eki ayğa uzatqan edi.
Qırımnıñ Curçı rayonınıñ Aybar (Voykovo) köyüniñ sakini İvan Yatskin 2019 yılda oktâbr 16-sında tutuldı. Bu 2019 senesi dekabr ayında belli oldı.
Polozov, Yatskin apiske alınğan soñ Qırımdan Moskvağa çıqarıldı, dep bildirgen edi. Onıñ aytqanına köre, Rusiye quvetçileri qırımlığa «büyük maneviy basqı» yaptı.
Qırım.Aqiqatnıñ Ukraina telükesizlik hızmetine yollağan muracaat cevabında İvan Yatskin UTH ile işbirligi yapmadı, dep aytıla.
Rusiye FSBsi devlet hainliginde qabaatlanğan qırımlı İvan Yatskinniñ davası boyunca tahqiqatnı küzde bitirmege planlaştıra.
