Rusiye alimleri, Yedi Quyu (Leninskiy) rayonınıñ Qız Avul (Yakovenkovo) köyünde Qız Avul qadimiy mezarlığında qazmalar yapqanda, yerastı dürbesinde kömülgen 12 adamnıñ naaşını taptılar, dep bildireler, cesedlerniñ arasında bir qılıçlı asker de bar edi. Bu aqta "Arheologiya" rusiye cemiyet fondu haber ete.
"Yazıq ki, dürbeniñ aşadaki qatlamlarında kömürlgen adamlarnıñ kemikleri yahşı saqlanmadı. "Yañı" ölüler, "qoranta"nıñ evel cılılğan azaları üstlerine qoyula edi, bunıñ içün qabir çoq qatlamlı oldı", - dep yaza fondnıñ haberinden "Krıminform" haber resursı.
Bundan ğayrı, beyanatta qayd etilgeni kibi, arheologlarnıñ malümatına köre, milâttan soñra 88-inci yılı tarihli imperator Domitsiannıñ Rim kümüş denariyi tapıldı.
Dürbede bir qaç boyuncaq, quşaq başı ve milâttan soñra I asırnıñ urbasından dögmeler tapıldı, bundan ğayrı çeşit-türlü keramik savut, mis savutları ve kümüşten yasalğan taşlı yüzük çıqtı.
"Tavrida" maşna trassasınıñ quruluvında tapılğan arheologik nesneler Qrımnıñ dört müzeyine berilecek, dep 2018 senesi mayıs ayında bildirele edi.
Qırım ilhaqından soñ, Rusiye yarımadada olğan bütün medeniy ve tarihiy degeri olğan obyektlerni öz yurisdiktsiyasına aldı. Kyiv, abideler Ukraina halqına aittir, dep itiraz ete ve olarnı UNESCO qoruması altına almağa muracaat ete.
