Ukraina prezidenti Volodımır Zelenskıynıñ fikirince, Qırım işğalden qurtarılmasa, yarımadanı işğal etken Rusiye ile yahşı munasebetler olacağını aytmağa mümkün degil. Emin ki, erte ya da keç Qırım Ukraina kontroline qaytar.
Bu aqta o, «Ukrayınska pravda» neşirine ayttı.
«Bir qaç yıldan soñ Rusiye halqı olğanlardan utanacaq. Qırım qaytarılmasa, birlik olmaycaq, ileri nesillerde Ukraina ve Rusiye halqlarınıñ yahşı, açıq, dost olmağa imkânları olmaycaq. Bu imkânsız. Biz qomşumız. Bu dairede yaşaymız ve kimse bir yerge köçmeycek», – dedi Zelenskıy.
O, Qırım Ukraina kontroline ne vaqıt qaytacağını tahmin etip olamay.
Rusiye tarafı Zelenskıynıñ aytqanlarına daa cevap bermedi. Faqat Kreml Qırımnıñ territorial mensüplik meselesi qapatıldı, dep bir qaç kere qayd etken edi.
Kyivdeki soñki matbuat konferentsiyasında Ukraina prezidenti Volodımır Zelenskıy Ukraina işğal etilgen topraqlarını, hususan Qırımnı kontroline qaytaruvdan vazgeçmey, dep işandırdı.
Baş nazir muavini – Ukrainanıñ vaqtınca işğal etilgen topraqlarınıñ reintegratsiya naziri Oleksiy Reznikov Qırım.Aqiqat Radiosınıñ yayınında Ukraina akimiyeti Qırımnıñ işğalden qurtarıluvınen bağlı muzakereler içün halqara meydançıqnı qurmağa istey, dep qayd etti. Amma onıñ ne vaqıt ve nasıl bir formatta olacağını tahmin etip olamay.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
