Hersonnıñ baş meydanında fevralniñ 26-nda «Qırımnıñ Rusiye işğaline qarşı tirenüv künü» munasebetinen fleşmob olıp keçti. Qırım.Aqiqat mühbiriniñ bildirgenine köre, onıñ iştirakçileri yazuvlı şiarlarnen kelip, ukrainalı siyasiy mabüslerni azat etmege ve «yarımada işğalini toqtatmağa» çağırdı.
«Qırımda qalğanlar rus imperiya devletiniñ reineleri ola. 5 yıl evelsi qırımtatarlar Qırım Muhtar Cumhuriyetiniñ Yuqarı şurasına yarımadanı Rusiyege teslim etmege imkân bermedi, ileride bunıñ neticesi faallerimizge qarşı repressiya dalğaları oldı. O vaqıttan çoq vaqıt keçse de, Ukraina ğalip çıqar ve Qırım onıñ terkibine qaytar, dep işanamız», – dep ayttı aktsiya iştirakçilerinden biri Ayşe Mamina.
Ukrainada fevralniñ 26-nı «Qırımnıñ Rusiye işğaline qarşı tirenüv künü» olaraq ilân etmege teklif eteler. 2014 senesi şu künü Qırım Muhtar Cumhuriyetiniñ Yuqarı Şurası ögünde Ukraina topraq bütünligine qoltutuv mitingi olıp keçken edi. Miting iştirakçilerine qarşı Rusiye tarafdarları, hususan «Rus birligi» firqası çıqtı.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
