«Qırım birdemligi» cemaat birleşmesinde teşkilâtnıñ koordinatorı Dilâver Memetovnıñ Qırım garnizon arbiy mahkemesiniñ binası yanında yaqalanmasınıñ tafsilâtlarını aytıp berdiler.
«Yaqalav aqqında "Grani.ru" mühbiri Ayder Kadırov haber etti. Onıñ sözlerine köre, Dilâver Memetov Qırım garnizon arbiy mahkemesiniñ binası yanına teneffüsten soñ kelgen ve mahkeme binasından 20 metr uzaqlıqta turğan. Oña taba polis hadimleri ketken, mühbir siga içmege ketkenler, dep tüşüngen. Qanun qoruyıcılar koordinatorğa "tekrar olğan bozuv" aqqıda bildirip, polis bölügine alıp ketkenler, sebep noyabrniñ 23-nde Edem Semedlâyevniñ qarşılap almasına kelmesi olğan. Onı polis kapitanı Aleksey Küznetsov yaqalağan», – dep yazıla bildirmede.
Vatandaş jurnalisti Abdulla Seydametovnıñ yaqalav sebepleri şimdiilk daa belli degil.
Aqmescitte Qırım garnizon mahkemesiniñ binası yanında Rusiye quvetçileri «Qırım birdemligi»niñ koordinatorı Dilâver Memetovnı ve Abdulla Seydametovnı yaqaladı.
Qırım garnizon arbiy mahkemesinde ekinci Bağçasaray «Hizb ut-Tahrir davası»nıñ mabüslerine çıqarılğan ükümge qarşı istinaf şikâyeti baqıla.
Noyabrniñ 22-nde Rostov-na-Donudaki Cenübiy bölgeniñ arbiy mahkemesi ekinci Bağçasaray «Hizb ut-Tahrir davası»nıñ mabüsleri Ernest İbragimov ve Oleg Födorovnıñ tevqif müddetini uzattı.
Rusiye quvetçileri noyabrniñ 23-nde Aqmescitteki vaqtınca tutuv izolâtorınıñ binasına 12 kün memuriy apiste qalğan advokat Edem Semedlâyevni qarşılamağa kelgen faallerni tuttı. Umumen 31 insan tutuldı, aralarında qadın ve balalar bar edi. Bundan ğayrı, yanlarında matbuat kartları olğan jurnalistler «alındı».
Noyabrniñ 24-nde Rusiye kontrolindeki Qırım mahkemelerinde qırımtatar faallerine qarşı memuriy protokollar baqıldı. Aqmescitniñ Kiyev rayon mahkemesi vatandaş jurnalisti Vilen Temeryanovnı 14 künge apiske aldı.
Ukraina akimiyeti, aq qorçalayıcılar, çetel elçihaneleri ve missiyaları Rusiyeni Qırımda böyle taqiplerni toqtatmasına çağıra. Rusiye akimiyeti buña qulaq asmay.