Ekinci "Qırım platforması" sammitiniñ keçirilmesi dünya toplulığınıñ Ukrayinağa yardımınıñ kuçlendirilmesine ilâve bir impuls berecek. Bunı Qırım.Aqiqatqa "Poisk.Plen" leyhasınıñ reberi, adliyeci ve aq qoruyıcı, advokat Nikolay Polozov bildirdi.
"Qırım platforması" sammiti şübesiz Ukrayinağa serbest dünya yardımınıñ arttırılmasına müsbet impul berecegine inanam. Bundan ğayrı soñki adiseler vaziyetinde sammitte ilân etilgen esas maqsatlardan biri Qırımnıñ işğalden azat etilmesi kettikçe daa kerçek ola", - dedi advokat.
Aynı zamanda, Rusiye propagandasınıñ Ukrayinağa dünya toplulığı tarafından yardım seviyesiniñ dersiñ emiyetli derecede eksilmesi ile bağlı beyanatları esassız olğanını qayd etti.
"Ukrayinağa yardımnıñ tezligi emiyetli derecede azlaşqanını tüşünmeyim. Başından faal şekilde aydınlatılğan esnaslarnıñ çoqusı artıq adiy alğa çevirildi ve olarğa diqqat azlaştı, lâkin ömürge keçirilmege devam ete. Elbette uzun vaqıt devam etken adisede yorğunlıq toplanuvı bar, cenkte böyle adiselerden biridir. Amma buña baqmadan Ukrayinağa destek vektorı deñişmedi", - dedi Polozov.
Avgustnıñ 23-nde bu yıl Rusiyeniñ Ukrayınağa qarşı büyük istilâsından soñ online şekilde «Qırım platformasınıñ» ekinci sammiti keçirildi.
Ukrayina prezidenti Volodımır Zelenskıy «Qırım platforması» sammitini açıp, qırımlılarğa Ukrayina akimiyeti Qırımğa «kesen-kes qaytacaq», dep ayttı.
«Qırım platforması» – Ukrayinanıñ teşebbüsinen qurulğan halqara mesleat-koordinatsion formattır. Onıñ maqsadı Qırım işğaline qarşı halqara cevap semereligini arttırmaq, telükesizlik havflarınıñ artmasına cevap bermek, Rusiye Federatsiyasına qarşı halqara basqını quvetleştirmek, insan aqlarınıñ bozuluvına yol bermemek ve Rusiye rejiminiñ qurbanlarını qorumaq, em de esas maqsadı Qırımnı işğalden azat etip, Ukrayinağa keri almaqtır.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
