Halqara "Qırım platforması"nıñ Horvatiyada keçirilgen 1-nci Parlament sammiti çerçivesinde Zagrebde Milliy ve universitet kitaphanesiniñ binasında evel Qırım.Aqikat ile işbirlik etkeyen jurnalistler Alina Smutko, Alöna Savçenko ve Taras İbragimovnıñ işlerinden ibaret olğan foto sergisi açıldı.
Qırım.Aqiqat mühbiriniñ haber etkenine köre, sergide Rusiyeniñ işğal etilgen Qırımda başlağan basqılar şaraitinde qırımtatarlarnıñ yaşayışına bağışlanğan yigirimge yaqın fotoresim taqdim etilgen. Fotoresimler 2014-2019-ncı yıllarda, FSB jurnalistlerniñ Qırımğa kirişini yasaq etmegence çıqarıldı.
Foto sergisini müelliflerden biri olğan Alina Smutko taqdim etti. Onıñ sözlerine köre, Qırımda kerçekten yüz bergeni aqqında malümatnıñ dünyağa bildirilmesi işğal etilgen yarımadanıñ malümat tecridi şaraitinde eñ müim vazifelerden biri olaraq qala.
"Qırımdan, Qırım aqqında yaratılğan er angi mahsul Qırımnıñ kün tertibine qaytarılması içün pek müimdir. Şimdi anda kiriş yoq, anda vaziyet ne olğanını tek laflardan ve ifadelerden biline. Kimerde adamlarnıñ anda ne ile yaşamaq mecbur olğanın bilmeymiz. Bundan ğayrı, Qırımda çekilgen vesiqalı kadrlar Qırımda olğan siyasiy mabüsler mevzusına diqqat çekmge yardım ete bile", - dey fotograf.
Alina Smutkonıñ sözlerine köre, "Qırım platforması" sammitinde fotoresimlerniñ taqdim etilmesi işğal etilgen Qırımda insan aqları ile bağlı muzakerelerge daa çoq adamnıñ celp etilmesine imkân berecek.
Alöna Savçuk 2018 senesine qadar Qırımda çalıştı. FSB Qırımğa kirişini 10 yılğa yasaq etti. 2019 senesi FSB Alina Smutkoğa Qırımğa kirişini 2028 senesine qadar yasaq etti. 2020 senesi FSB Taras İbragimovğa Qırımğa kirişini 34 yılğa yasaq etti.
Oktâbrniñ 24-nde Horvatiyada "Qırım platforması"nıñ 1-nci Parlament sammiti öz işini başladı. Sammit eki kün devam etecek. Birinci kün Qırımnıñ işğalden azat etilmesinden soñ reintegratsiyası meselelerine, keçüv adliye ve Rusiyeniñ halqara cinayetleri içün mesüliyetke çekilmesi aqqında munaqaşalarğa bağışlanğan.
Avgustnıñ 23-nde bu yıl Rusiyeniñ Ukrayınağa qarşı büyük istilâsından soñ online şekilde «Qırım platformasınıñ» ekinci sammiti keçirildi.
Ukrayina prezidenti Volodımır Zelenskıy «Qırım platforması» sammitini açıp, qırımlılarğa Ukrayina akimiyeti Qırımğa «kesen-kes qaytacaq», dep ayttı.
«Qırım platforması» – Ukrayinanıñ teşebbüsinen qurulğan halqara mesleat-koordinatsion formattır. Onıñ maqsadı Qırım işğaline qarşı halqara cevap semereligini arttırmaq, telükesizlik havflarınıñ artmasına cevap bermek, Rusiye Federatsiyasına qarşı halqara basqını quvetleştirmek, insan aqlarınıñ bozuluvına yol bermemek ve Rusiye rejiminiñ qurbanlarını qorumaq, em de esas maqsadı Qırımnı işğalden azat etip, Ukrayinağa keri almaqtır.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
