Kreml kontrolindeki Qırım parlamenti ilhaqnıñ beş yılı munasebetinen 407 biñ rublelik 500 medal yapılmasını sımarladı. Bu aqta Qırım parlamentiniñ spiker muavini Yefim Fiks bildirdi.
«Bu yubiley medali. Martnıñ 15-ne qadar yetiştirmek kerekmiz. Yarışnı «Qırım baariniñ» yıllığına medallerni azırlağan «Goznak» Moskva zavodı yuttı», – dep yaza Fiksniñ aytqanlarını «Krıminform».
Spiker muavininiñ aytqanına köre, qomşu Rusiyeden «musafirler» ve «Qırım referendumınıñ» keçirilüvini teşkil etkenler» medallernen taqdirlenecek.
Parlament qararına binaen, yubiley medali 2019 ve 2020 seneleri berilecek.
Devlet sımarışında aytılğanına köre, medaller baqır ve çinkeden yapılacaq. Olarnen beraber taqdirlevni tasdıqlağan şeadetnameler de berilecek eken.
Medalniñ oñ tarafında yuqarıda «Qırım Rusiyenen beraber» dep yazılacaq. Ortada Qırım parlamenti ögündeki bayraqlarnen erkek ve qadın olacaq, altta – defne pıtaqları. Ters tarafta – «Beş yıl hatırası», ortada grifon resmi, altında «Qırımnıñ Rusiye ile ğayrıdan birleşüvi 2014-2019» yazısı olacaq.
2018 senesi dekabr ayında Rusiye kontrolindeki Qırım parlamenti yarımada ilhaqınıñ beş yılına medalni tesis etti.
Ukrainanıñ Qırımı zapt etilgen soñ Rusiyede arbiy, siyasetçi ve «Qırım samooboronasınıñ» vekilleri «Qırımnıñ qaytarılması» medalinen taqdirlenmege başladı. Anda bu tedbirler 2014 senesi fevralniñ 20-nden 2014 senesi martnıñ 18-ne qadar keçirildi, dep qayd etile.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
