Rusiyeniñ Qırım insan aqları vekâletlisi Lüdmila Lubina Aqmescitniñ №1 SİZOsı iyülniñ 1-nde belli olğan qızamıq tarqalmasını toqtattı, dep bildire. Bu aqta o, Qırım.Aqiqat mühbirine tarif etti.
«(Qırğınlıqnıñ – QA) cayılmasını toqtatqanlar, şimdi SİZOda qızamıq yoq. Qızamıq, qırğınlıq bar edi, amma onı bastırğanlar. Bir-eki hasta bar edi, qızamıq alâmetleri bar edi, şimdi olar (mabüsler) hasta degil», – dep ayta ombudsmen.
Advokat Lilâ Gemeci Qırım.Aqiqat mühbirine izaat berip, tahqiqat izolâtorınıñ binasında «Tibbiy maskanı taqıp yürmek» ilânları asılğan, dep tarif etti.
«Bugün (iyülniñ 24-nde) SİZOğa bardım, bütün divarlarda «SİZOda tek tibbiy maska taqıp yürmek» ilânları asılğan. Bilem ki, Edem Smailov (Bağçasaraydaki ekinci Hizb ut-Tahrir davasınıñ mabüsi – QA) ve Rustem Emirüseinov (Qurmandaki Hizb ut-Tahrir davasınıñ mabüsi) alâ daa karantin kamerasında tutula», – dep tarif etti o.
İyünniñ soñunda Gemeci müvekkili Server Mustafayevniñ qızamıq hastalığı telükesine oğratıluvı sebebinden SİZO memuriyetine qarşı dava açtırdı. Advokatnıñ fikirince, dava açılmasınıñ sebebi Mustafayevniñ SİZOdan mahkeme oturışuvına o vaqıt karantin kamerasında bulunğan Bağçasaraydaki ekinci «Hizb ut-Tahrir davasınıñ» diger mabüsi Memet Belâlov ile beraber ketirilmesi oldı.
«Jeleznodorojnıy rayon mahkemesi acayip bir cevap berdi. Mahkemeniñ fikirince, yañlışlar olmadı, çünki mabüslerni taşıycaq naqliyat cinaiy dava çerçivesinde sımarlanğan edi. Bu cevapnı nasıl izaatlaycağımnı bile bilmeyim, bu cevap SİZOğa qarşı davama iç uyğun degil», – dedi advokat.
İyülniñ başında Rusiyeniñ Cezalarnı yerine ketirüv federal hızmeti Aqmescit SİZOsında mabüsler arasında qızamıq çıqarğanlar bar olğanını Rusiye kütleviy haber vastalarına tasdıqladı.
Daa evel haber etilgeni kibi, Qırımda «para talap etüv davası» boyunca mahküm etilgen Aluşta Rusiye şeer şurasınıñ sabıq deputatı Pavel Stepançenko Aqmescit SİZOsında qızamıq çıqardı.
