Link açıqlığı

Qırım notariusları Medvedevden iş qaytaruvnı talap eteler


Qırım notariusları Rusiye ükümet reisi Dmıtro Medvedevge ve öz başına tayinlengen Qırım nazirler Şurasınıñ reisi Sergiy Aksönovğa muracaatnı aşkâr ettiler.

Beyanatnıñ metninde yazılğanı kibi, Rusiye ve Qırım adliye vekilleriniñ resmiy körüşüvinden soñ, ukrain qanunları boyunca çalışqan notariuslarnıñ kelecegi aqqında bir de bir açıq-aydın netice peyda olmadı.

«Qırım notariuslarınıñ Rusiye ve Qırım notarius yolbaşlçıqları ile körüşüvde aytılğan şeylerden ve Qırım ile Aqyar notariuslarınıñ Rusiyege keçüvi boyunca alınğan qararlarnıñ mündericesinden al-azırda Qırımda ukrain notarisularğa ve notariuslarnıñ yardımsız qalağan sakinlerge ne yapmağa añlaşılmayıp qaldı», – dep aytıla beyanatta.

Rusiye mütehassısları notarius faaliyetini amelge keçirmek içün aqqı boyunca Ukrain şeadetnameleri olğan, amma qoşuluv vaqtında çalışmağan şahıslarnıñ statusını da belgilemedi.

«Bu er şey Qırım ealisi arasında keñ tarqalğan «Qırım içün 10 garantiya» degen manifestiniñ 3-ncı maddesine baqmadan olıp keçe. Oña binayen «evel elde etilgen şeadetnameler, malümat kâğıtları, diplom ve Qırım MC ve Ukraina devlet organları tarafından berilgen vesiqalar Rusiye Federatsiyasında öz küçüni coymamaq ve tamamen qabul olunmaq kerek edi. Olarnıñ Rusiye vesiqalarğa deñiştirüv ketişatı keçici vaqıt içinde yapılacaqtır», – qayd etile beyanatta.

Aqiqatta ise bam-başqa areketler yüz bere – Qırım notariuslarından ekseriyeti şimdi Rusiyede işsiz gruppanı teşkil eteler. Olar pasportnıñ alınuvıdan, oqutuvdan, ihtisas imtiannıñ tapşıruvıdan, litsenziyanıñ el etüvinden (eger de tapşırıp olsañ), kvotalardan soñ (berseler eger) bir de bir vazifege iddia ete bile.

Metinde qayd olunğanı kibi, böyle şaraitlerni begenmegen insanlarğa Ukrainağa ketmege teklif eteler.

«Ya da, belki, Qırımnıñ notarius оligarhlarına bu keçici müddetten faydalanıp, Qırım notariuslarınıñ sayısını azlaştırmağa elverişlidir. Em de añılğan toplaşuvda Qırım notariuslarınıñ sayısı Rusiye standartlarına ters kelgeni de aytılğan edi», – tarif etile beyanatta.

Yuqarıda aytılğan sözlerge köre ve «Qırım içün 10 garantiya» manifestine tayanıp, Qırım notariusları rica eteler:

–Ukraina notariuslarınıñ Qırımda olğan statusını ve keçici müddet devamında yapıla bilecek areketlerini uquqiy aktnen qayd etmge;

–qoşuluv vaqtında çalışqan Qırım notariusları içün kvotalarnı saqlmaq;

–qoşuluv vaqtında işlemek aqqını bergen Ukraina adliye Nazirliginiñ şeadetnameleri olğan şahıslarğa RF litsenziyanıñ aluvını qolaylaştırmaq;

–kündüz oqutuvdan keçmek içün imkânları olmağan şahsılarğa öz başına oqumağa izin bermek.
XS
SM
MD
LG