"Qırım musulmanları" davasınıñ mabüsi Edem Smailov Rusiyeniñ Kostroma vilâyetindeki cezahanege etap etildi. Bunı "Qırım birdemligi" cemaat birleşmesi siyasiy mabüsniñ ömür arqadaşına atfı etip haber ete.
Edem Smailovnıñ apayınıñ sözlerine köre, Vlasihadaki Rusiye Arbiy istinaf mahkemesiniñ 2022 senesi martnıñ 14-nde apis müddetiniñ deñiştirilmeden sert koloniyada qalması aqqında qararnı ilân etken soñ Smailovnıñ etam etilme esnası beş ay alğan.
O, Kostroma vilâyetine kelip çıqqan soñ tek üç aftadan soñ bulunğan yeri aqqında haber berip olğan. Onıñ sözlerine köre, cezahane ormanda yerleşe ekene, anda 500 mabüs tutula, onıñ otrâdında 100 adam eken. Kelgen soñ 2 qat qış ve yaz urbasını, yataq çamaşırını bergenler. Cezahane qızdırıla, anda şimdi sıcaq eken.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
Rusiyeniñ Rostov-na-Donu Cenübiy okrugınıñ arbiy mahkemesi 2020 senesi sentâbr ayında Bağçasaraydaki ekinci «Hizb ut-Tahrir davası» boyunca üküm çıqardı.
Ukrayina prezidenti Volodımır Zelenskıynıñ temsilciligi Bağçasaraydaki ekinci «Hizb ut-Tahrir davasınıñ» ükmüni «arbiy cinayet» dep adlandırdı. Reintegratsiya nazirligi, qırımtatarlarğa qarşı çıqarılğan üküm sebebinden Rusiyege qarşı sanktsiyalarnı sertleştirmege talap etecek, dep bildirdi.
Qırım Muhtar Cumhuriyeti ve Aqyar prokuraturası Bağçasaraydaki «Hizb ut-Tahrir davasınıñ» mabüslerine qarşı çıqarılğan ükümni Qırımdaki diniy taqiplerniñ delili dep adlandırdı.
2020 senesi oktâbrniñ 6-nda bu dava boyunca üküm etilgenler Rostov-na-Donu SİZO-5-ne etap etildi. Dekabr ayında Bağçasaraydaki ekinci «Hizb ut-Tahrir davasınıñ» yedi mabüsi Rostov-na-Donu tahqiqat izolâtorından Novoçerkassk SİZO-3-ne avuştırıldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
