Ekinci Aqmescit "Qırım musulmanları davasınıñ" mabüsi Tofik Abdulgaziyevnge verem diagnozı qoyuldı, dep tarif etti "Qırım birdemligi"ne advokatı Emil Kurbedinov.
Berilgen malümatqa köre, ekimler qırımlıda daa bir sıra hastalıq taptı: eki taraflı pnevmoniya, sol taraflı kiçik gidrotarak (aqcigerde suv), orta dereceli anemiya, mitral klapanı zararlanğan bağlama toquması displaziyası sindromı (yürek hastalığı), devamlı yürek yetersizligi.
Kurbedinov qayd etti ki, şimdi Abdulgaziyevniñ ağır hastalığı sebebinden mahkemege berilmesi içün ariza ve kerekli vesiqalarnı azırlay. O, Çelâbinsk vilâyetiniñ insan aqları vekâletlisi Yuliya Sudarenkoğa muracaat etip, qırımlığa kerekli tedaviylevniñ köstermesini rica etti.
Qırımlınıñ apayı Aliye Kürtametovanıñ aytqanına köre, aqayı bağğa çıqmay ve onıñ alı aqqında bir şey belli degil.
"Onıñ içün qasevetlenemiz. Bu diagnoz ile Tofikniñ daa ziyade tedaviylev, baqıluv ve ğıdalanuvğa ihtiyaci bar, amma apishanede bu imkânsızdır. Onıñ sağlıq vaziyeti aqqında tek bilgenim - qanaatlendirici", - dep qoştı ömür arqadaşı Abdulgaziyeva.
Martnıñ 22-nde «Qırım birdemligi» aq qorçalayıcı teşkilâtı «Qırım musulmanları davasınıñ» mabüsi Tofik Abdulgaziyevni Rusiyeniñ Verhneuralsk apishanesinden Çelâbinskteki tuberkulöz hastahanesine ketirdiler, dep bildirgen edi. Qayd etilgenine köre, qırımlınıñ al kritik, Cezalarnı yerine ketirüv federal hızmetiniñ hadimleri ve apishane hastahanesi soy-soplarına telefonda tafsilâtlı malümat bermedi.
Tofik Abdulgaziyev apiske alınmazdan evel Qırım siyasiy mabüsleriniñ balaları içün tedbirlerniñ teşkil etilmesinde iştirak ete edi. «Qırım birdemligi» cemaat birleşmesiniñ faali, ses operatorı, «Qırım balalığı» leyhasınıñ iştirakçisi edi.
Bundan ğayrı, siyasiy mabüslerge SİZO-ğa aşayt mallarını berüvnen oğraşa, siyasiy sebeplernen bağlı davalar boyunca mahkemelerge bara, evlerinde tintüv keçirilgen semetdeşlerge qol tutmağa kele edi.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi.
2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
2022 senesi mayısnıñ 12-nde Rostov-na-Donudaki Cenübiy bölgesiniñ arbiy mahkemesi ekinci Aqmescit «Hizb ut-Tahrir davasınıñ» mabüsleri Tofik Abdulgaziyev, Vladlen Abdulkadırov, İzzet Abdullayev, Mecit Abdurahmanov ve Bilâl Adilovğa üküm çıqardı. Olar 12 ile 14 yıl apis cezalarsına mahküm etildiler. İzzet Abdullayev ilk 5 yılını apishanede keçirecek 12 yıl sert rejimli koloniyada qalmasına ve azat etilgen soñ 1 yıl azatlığı sıñırlanacaq, dep üküm çıqarıldı.
2023 senesi iyül ayında Tofik Abdulgaziyev Rusiye Federatsiyasınıñ Çelâbinsk vilâyetiniñ Verhneuralsk apishanesine etap etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
