Sizikovnı 2024 senesi dekabrniñ ortasında Aqmescitniñ 1-nci SİZO-sından etap ettiler. Onıñ aytqanına köre, Qırımdan o, diger mabüsnen kete. Sizikov, başqa yerge alıp keteceklerini qayd etti, amma etap ne vaqıt olacağını aytmağanlar. Belki de, olarnı yanvarniñ 13-nde Volgogradtan alıp ketecekler.
Qırımlı onı Krasnoyarsk vilâyetine etap etkenlerini de tasdıqladı, amma qaysı müessisege ketirgenlerini aytmadı.
"Bütün tranzit noqtalarında bizni mahsus kameralarğa yerleştireler ve bizim sert rejimimizge açıq-aydın riayet eteler. Şükürler olsun, Aqmescitten başlap, menimnen bir yönelişte ketken İgor er şeyde yardım ete. Bizim etapımız çoq devam ete, ve bizni dekabrniñ 26-nda Aqmescitten çıqarılğan diger Qırım gruppası endi kelip yetti. <...> Er şey yahşı, biri-birimizge qol tutamız ve biri-birimizge yardım etemiz", — dep yazdı Siziqov.
Sentâbrniñ 13-nde Rusiye Federatsiyasınıñ istinaf arbiy mahkemesi qırımlınıñ 17 yıllıq ükmüni deñiştirmedi. Ertesi künü işğalci uquq qoruyıcılar Aleksandrnı apiske aldı. Sentâbrniñ 14-nde aqşam Sizikovnı evinden alıp, Bağçasaraydaki izolâtorğa alıp ketkenler, eşyalarını azırlamağa ruhset bermediler, dep bildirdi anası Yelena. Aleksandr kamerada bir özü edi. Aleksandrnıñ advokatı kör Sizikov tuta-tuta areket ete ve tek eki künden soñ unitaz ve rakovina olğan yerge yol tapıp olğanını aytqan edi. Sentâbrniñ 19-ı gecesi onı Aqmescit şeerindeki SİZO-1-ge avuştırdılar.
Aq qorçalayıcılar qayd etkenine köre, Rusiye qanunlarına köre, bütünley körüv qabiliyetini coyğan insanlar tüzetüv müessiselerinde ceza müddetini keçirüvden azat etilmek kerekler. Lâkin Rusiye mahkemesi Aleksandr Sizikovnı cezasını tüzetüv müessisesinde keçire bilgen adam olaraq tanıdı, Aqmescitteki Rusiye SİZO-1-niñ tibbiy hadimleri onıñ bütün hastalıqları aqqında vesiqasını qabul etmeyip, eski olğanını aytqanlar. Tibbiy bölük Sizikovnıñ tibbiy teşkerüvini özleri keçirecekler, dep bildirdi.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Emil Ziyadinov, Zekirya Muratov, İsmet İbragimov, Alim Sufyanov, Seyran Hayredinov, Vadim Bektemirov mahkemede apiske alındı ve Aqmescitniñ ceza izolâtorına qapatıldı. I derece köz saqatı olğan Aleksandr Sizikov ev hapsine yollanıldı. Tutulğanlar Rusiyede yasaqlanğan «Hizb ut-Tahrir» diniy teşkilâtınen alâqaları bar olğanında qabaatlandı.
2023 senesi mayıs ayında Sizikov ilk dört yılnı apishanede keçirecek 17 yılğa üküm etildi. 2024 senesi sentâbrniñ 13-nde Rusiye Federatsiyasınıñ istinaf arbiy mahkemesi qırımlınıñ ükmüni deñiştirmedi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
