"Qırım musulmanları" davası üzre qabaatlanğan Aleksandr Sizikov, Alim Sufyanov ve Seyran Hayredinovnıñ tevqif müddeti üç ayğa uzattırıldı. Bunı advokat Lilâ Gemeci haber etti.
O, salı künü mahkeme oturışınıñ keçirilmegenini bildirdi. Sebep ise resmiy zaruriyetten eki mahkemeciniñ iştirak etmemesidir. Buña baqmadan mahkeme Sizikovnıñ ev apsi ve Sufyanov ve Hayredinovnıñ tevqif müddetini iyülniñ 20-nece uzattırıdı.
Qabaatlav tarafı mahkeme delillernen tolu derecede tanışmağanını saya. Nevbetteki mahkeme oturışı aprelniñ 24-nde olacaq.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Qurman rayonınıñ Büyük Onlar qasabasında Emil Ziyadinov, Aqmescit rayonınıñ Kurtsı qasabasında İsmet İbragimov, Bağçasaray rayonınıñ Jeleznodorojnoye köyünde Alim Sufyanov, Bağçasaray rayonınıñ Süyür Taş (Belokamenka) köyünde Seyran Hayretdinov, Bağçasaray rayonınıñ Sevastyanovka köyünde Aleksandr Sizikov, Aqmescit rayonınıñ Bavurçı (Kamenka) köyünde Vadim Bektemirov ve Aluştada Dilâver Memetovnıñ. O, tintüv keçirilgende evde degil edi, onı qıdırmağa devam eteler.
Martnıñ 27-nde «Qırımlı musulmanlar davasınıñ» mabüsi Aleksandr Sizikov Bağçasaray merkeziy rayon hastahanesiniñ nevrologik bölügine alındı.
Rusiye Federatsiyasınıñ Cenübiy okrugınıñ arbiy mahkemesinde Rusiye devlet qabaatlavı «qırımlı musulmanlar davasınıñ» mabüsi Aleksandr Sizikovnı 18 yılğa, daa eki qırımlı – Alim Sufyanov ve Seyran Hayredinovnı 14 yılğa azatlıqtan marum etmege talap ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
