"Qırım musulmanları davası"nda mahküm etilgen Teymur Abdullayev 750 künden çoq ceza izolâtorında tutula, dep bildire "Qırım birdemligi" cemaat birleşmesi.
Abdullayev bunı onı işbirlik yapmağa iqna etken Rusiye Federatsiyanıñ mahsus hızmet organlarınıñ operativcileriniñ ziyareti ile alâqalandıra, dep qayd ete advokat Edem Semedlâyev.
"Cezahaneniñ reberligi uydurma qabatlarğa atıf etip, bütün şikâyetlerni red ete", - dedi imayeci.
Uquq qoruyıcalar, cezahaneniñ reberligi Abdullayevge qarşı bu munasebetni onıñ "yaramay niyetli bozucı" olması ile añlata. ŞİZO-da nevbetiy qalma müddetleri arasında qırımtatarnı qattı baquv şaraiti olğan kamerağa avuşıralar ve bundan soñ kene ceza izolâtorına yerleştireler.
"Eñ meraqlı şey, artıq hadimler onıñ ŞİZO-da qalma müddetiniñ uzattırılması aqqında evelden haber etele. O, ceza izolâtorında keçirgen künlerniñ sayısını esapladı ve bu artıq 750 künden çoqtır", - dey Abdullayevniñ apayı.
"Qırım birdemligi"niñ haber etkeni kibi, ceza izolâtorındaki şarait sebebinden Abdullayevniñ sağlığı ile problemaları fenalaşqan.
Rostov-na-Donunıñ Cenübiy okrugınıñ arbiy mahkemesi bu davanıñ mabüslerine 2019 senesi iyün ayında üküm çıqardı. Daa soñra Rusiye Yuqarı mahkemesi qırımlılarnıñ ükmüni deñiştirdi.
Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñ ükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
Ukraina Tış işler nazirligi bu davağa qarşı narazılıq bildirip, Rusiyege qarşı sanktsiyalarnı quvetleştirmege çağırğan edi.
«Memorial» aq qorçalayıcı merkezi bu davanıñ bütün mabüslerini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
