Bağçasaraydaki dördünci "Hizb ut-Tahrir davasınıñ" mabüsi Zekirya Muratovnıñ ükmü Rostov-na-Donudaki Cenübiy bölgeniñ arbiy mahkemesinde 2022 senesi fevralniñ 11-nde ilân etilmek kerek. Bunı Qırım.Aqiqatqa faal Lutfiye Zudiyeva haber etti.
Mahke oturışı saat 10:00 başlanacaq.
Evel, Bağçasaraydaki dördünci «Hizb ut-Tahrir davasınıñ» mabüsi Zekirya Muratovnıñ apis müddetini üç ayğa – 2022 senesi fevralniñ 17-ne qadar uzatqan edi.
Muratov 3-ünci derece saqatıdır. Faallerniñ aytqanına köre, adale-taqlet sistemasınıñ hastalıqları ve gipertoniya ve stenokardiya hronik hastalıqları bar. Aqımdaki seneniñ martnıñ 23-nde gipertonik kriz keçirdi.
Rusiye quvetçileri Zekirya Muratovnı iyülniñ 7-nde tuttı. FSB, onı «Hizb ut-Tahrir» bölüginde iştirak etkeninde qabaatlay. Rusiye quvetçileriniñ areketlerini Ukraina prezidentiniñ Qırım Muhtar Cumhuriyetindeki daimiy temsilciligi takbih etti, Qırım Muhtar Cumhuriyeti ve Aqyardaki Milliy politsiya Baş idaresi tintüvler aqqında Ukraina Ceza kodeksiniñ 162-nci maddesiniñ 2-nci qısmına (mesken tiyilmemezligini bozuv) ve Ukraina Ceza kodeksiniñ 146-ncı maddesiniñ 2-nci qısmına (qanunsız alda azatlıqtan marum etüv) istinaden cinaiy tahqiqat başlattı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
