Vladimirskiy tsentralda cezasını çekken "Qırım musulmanları davası" mabüsi Eskender Abdulganiyev RF vatandaşlığını qabul etmekten red etti. Bunı "Qırım birdemligi" cemaat birleşmesi advokat Alan Kaçmazovğa atfı etip bildire.
Apishanede advokatnıñ Abdulganiyev ile körüşmesine er türlü mania olmağa tırışqanlar. Qısqa körüşüv vaqtında siyasiy mabüs onı ayrı bölükke keçirgenlerini ve anda onen beraber daa 7 adam bulunğanını aytıp berip oldı. Şu binada tamir işleri devam ete ve bu sebepten anda suvuq eken.
"Eskender Rusiye vatandaşlığını qabul etmekten ve ant etmekten red etkeni içün anda avuştırılğanını tahmin ete. O artıq eki aydır bu binada buluna", - dedi advokat.
Tevqif etilmezden evel siyasiy mabüsniñ ukrayin vesiqaları bar edi.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
2020 senesi noyabrniñ 3-nde saba Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davasınıñ» üç mabüsi Rustem Emiruseinov, Arsen Abhairov ve Eskender Abdulganiyevni 17, 13 ve 12 yılğa üküm etti. Olar qabaatlarını tanımadı. Mahküm etilgen qırımlılarnıñ advokatları ükümni şikâyet etip, Avropa insan aqları mahkemesine barmağa niyetlene.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
