60 yaşındaki "Qırım musulmandarı davası"nıñ mabüsi Cemil Gafarov infarktqa oğradı. Bunı "Qırım birdemligi" cemaat birleşmesi haber etti.
Gafarovnıñ sözlerine köre, sağlığı oktâbrniñ 27-nde Rusiye mahkemesiniñ oturışını advokatlarnıñ kelmemesi sebebinden başqa vaqıtqa qaldırılğan vaqıtta keskin şekilde zayıflaşqan. Mabüslerni mahkemeden keri SİZO-ğa alıp ketkenler. Bundan soñ Gafarov infarkt keçirid. O dört kün devamında yataqtan turıp olamağan.
Bundan ğayrı onıñ iş qabiliyeti eksilgen, buğumlarında çekiştirici ağrılar peyda olğan. Devamlı mahkeme oturışlarından soñ tüzelmek içün uzun zamanğa ihtiyacı bar.
59 yaşında Cemil Gafarov 2019 senesi martnıñ 27-nden berli terrorizmden şübheli sayılıp, SİZOda buluna. Onı Rusiyede yasaqlanğan «Hizb ut-Tahrir» firqasında iştirak etkeninde qabaatladılar. Gafarov – ekinci derece saqatı, izolâtorda tutuluvı ayatı içün telüke taşıy. Gafarov 10 yıldan 20 yılğa qadar azatlıqtan marum etile bile.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
