"Qırım musulmanları davası"nıñ mabüsi Cemil Gafarov Rusiyeniñ Rostov-na-Donudaki apishane hastahenesine yatqızıldı. Bunı "Qırım birdemligi" cemaat birleşmemi haber ete.
Qırımlınıñ hasthanege yatqızılması aqqında "Qırım birdemligi"ne Rostov-na-Donudaki Cenübiy bölge arbiy mahkemesinde keçirilgen mahkeme oturışınıñ kâtibinden malüm oldı.
"Qırımlı faal eñ azı eki afta 19-ncı (MOTB-19) vilâyetlerara verem hastahanesinde baqınacaq ve tedaviylenecek", - dedi mahkemeciniñ yardımcısı Mariya Tkaçenko.
Qayd etilgeni kibi, Gafarov hastahanege daa inniñ başında yatqızılğan.
Sağlıq alı aqqında şimdilik haber etilmey.
59 yaşında Cemil Gafarov 2019 senesi martnıñ 27-nden berli terrorizmden şübheli sayılıp, SİZOda buluna. Onı Rusiyede yasaqlanğan «Hizb ut-Tahrir» firqasında iştirak etkeninde qabaatladılar. Gafarov – ekinci derece saqatı, izolâtorda tutuluvı ayatı içün telüke taşıy. Gafarov 10 yıldan 20 yılğa qadar azatlıqtan marum etile bile.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
