11 yıl apis cezasına mahküm etilgen islâm ilimleri magistri ve arap tili filologı Vadim Bektemirov Rusiyeniñ Sankt-Peterburg şeerindeki 6-ncı sanlı tüzetüv cezahanesinde tapıldı. Bu aqta "Qırım birdemligi" bildirdi.
Ailesi cezahaneniñ müdiri Bubnovdan bir bildirme alğan. Qırımtatarnıñ Rusiyeniñ Lipetsk vilâyetiniñ Yelets apishaneden etap etilgeni daa sentâbrniñ 21-nde belli olsa da, cezahane müdiriyetiniñ mektübi Bektemirovnıñ ömür arqadaşı Lemarağa tek noyabrniñ 20-nde kelgen.
Qadınnıñ sözlerine köre, o, elektron poçtanen, Rusiye poçtası vastasınen bir qaç Rusiye cezahanesine aqayınıñ ne yerde olğanını sorağan bir çoq mektüp yollağan. Cevap ya da yoq edi, ya da Bektemirovnıñ olarda olmağanı bildirile edi.
2020 senesi iyülniñ 7-nde Rusiye uquq qoruyıcıları yedi qırımtatarını tuttı: Emil Ziyadinov, İsmet İbragimov, Zekirya Muratov, Vadim Bektemirov, Alim Sufyanov, Seyran Hayretdinov mahkemede apiske alındı ve Aqmescit tahqiqat izolâtorına avuştırıldı. 1-inci derece saqatı olğan Aleksandr Sizikov ev apsine alındı. Tutulğanlar Rusiyede yasaqlanğan «Hizb ut-Tahrir» diniy teşkilâtı ile alâqaları bar olğanında qabaatlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
