Ekinci Aqmescit "Hazb ut-Tahrir davası"nıñ mabüsi Bilâl Adilovnıñ ailesi onıñ ne yerge etap etilmesini bilmey. Bunıñ aqqında "Qırım birdemligi" haber etti.
Uquq qoruyıcılarnıñ haber etkeni kibi, soñki sefer apayı onen iyün ayında laf etken.
"Men er yerge em telefon ettim, em yazdım, kimse bir şey demey. Bir ay bir şey belli degil", - dep qayd etti Gülnara Adilova.
İyünniñ 28-nde Novoçerkask SİZO-sından üç qırımtatarnı çıqarğan ediler, olarnıñ arasında Bilâl Adilov, Vladlen Abdulkadırov ve Tofik Abdulgaziyev.Çelâbinskten ise olarnı farqlı yerlerge alıp ketkenler.
"Başqalarnı Minusinsk ve Yeniseysk apishanelerine yolladılar, men anda da mektüp yazdım, amma cevap yoq. Novoçerkask SİZO-sına telefon etti, Rusiye FSİN-ge muracaat ettim, kimse bir şey aytmay", - dep qoştı o.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi.
2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske alğan edi.
Mayısnıñ 12-nde Tofik Abdulgaziyev, Vladlen Abdulkadırov, İzzet Abdullayev, Mecit Abdurahmanov ve Bilâl Adilovğa qarşı qabaatlayıcı qarar çıqardı. Olarnı 12 yıldan 14 yılğa qadar ilk 5 yılını apishanede keçirmek şartınen sert rejimli koloniyada qalmalarına üküm ettiler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
