Yazda Rusiyeniñ Çelâbinsk vilâtiniñ Verhneuralsk apishanesine etap etilgen ekinci Aqmescit "Hizb ut-Tahrir davası"nıñ mabüsi, "Qırım birdemligi" cemaat birleşmesiniñ faali Tofik Abdulgaziyev el ve ayaq buğumlarında ağrınen çekişe eken ve 15 kilo azğan.
Bunı "Qırım birdemligi" cemaat birleşmesi onı apishanede oğlu ile beraber ziyaret etken apayı Aliye Kurtametovağa atıf etip bildire.
Onıñ sözlerine köre, avalandıruv olmağanı içün apisliler kameranıñ penceresini daima açıq tutmağa mecbur ekenler. Muntazam artqaç suvuma sebebinden Tofik Abdulgaziyev el ve ayaq buğumlarında ağrınen çekişip başlağan. O normal şekilde yürip, tışarığa çıqıp ve sportnen oğraşıp olamay eken. Apishaneniñ müdiri ile körşüvde soy-sopu keregi kibi tedaviylev körmek içün hususiy ekim kerek olğanını bilgen.
"Adamnıñ ömründen beş yılını çaldılar. Bu sistema aqaylarımıznı fizikiy ceetten yoq ete. Amma olarnıñ dinini, imanını olar yoq etip olamaycaqlarını kördim", dep bildirdi apayı.
2022 senesi mayısnıñ 12-nde Rostov-na-Donudaki Cenübiy okrugınıñ arbiy mahkemesi qırımtatarlarnı «Hizb ut-Tahrir» teşkilâtına alâqası bar olğanında qabaatladı. Bilâl Adilov, Tofik Abdulgaziyev, Vladlen Abdulkadırov, İzzet Abdullayev ve Mecit Abdurahmanov umumen 62 yılğa azatlıqtan marum etildiler.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
