"Qırım musulmanları davası"nıñ figurantı, I gruppa körme saqatı Aleksandr Sizikovnı Aqmescitniñ 1-inci SİZO-sından Rusiye Federatsiyasınıñ Krasnoyarsk vilâyetine etap ettiler. Bu aqta "Gratı" neşriyatınıñ telegram kanalı qırımlınıñ anası Yelena Sizikovağa atıf etip bildire.
Daa evel Sizikovnıñ advokatı, onıñ diagnozı 2004 senesi Rusiye ükümeti tarafından tasdıqlanğan cezanı çekmege imkân bermeycek hastalıqlar cedveline kirgeni sebebinden Rusiye cezahanesine etapnı toqtatmağa rica etken edi.
"2024 senesi dekabrniñ 9-nda Krasnoyarsk ülkesinde Rusiye GUFSİN-niñ idaresine yollanıldı", — dep, Qırımdaki 1-nci SİZO-nıñ yolbaşçısı Sergey Geberleyn Yelenağa poçta mektübinde bildirdi.
Sentâbrniñ 13-nde Rusiye Federatsiyasınıñ istinaf arbiy mahkemesi qırımlınıñ 17 yıllıq ükmüni deñiştirmedi. Ertesi künü işğalci uquq qoruyıcılar Aleksandrnı apiske aldı. Sentâbrniñ 14-nde aqşam Sizikovnı evinden alıp, Bağçasaraydaki izolâtorğa alıp ketkenler, eşyalarını azırlamağa ruhset bermediler, dep bildirdi anası Yelena. Aleksandr kamerada bir özü edi. Aleksandrnıñ advokatı kör Sizikov tuta-tuta areket ete ve tek eki künden soñ unitaz ve rakovina olğan yerge yol tapıp olğanını aytqan edi. Sentâbrniñ 19-ı gecesi onı Aqmescit şeerindeki SİZO-1-ge avuştırdılar.
Aq qorçalayıcılar qayd etkenine köre, Rusiye qanunlarına köre, bütünley körüv qabiliyetini coyğan insanlar tüzetüv müessiselerinde ceza müddetini keçirüvden azat etilmek kerekler. Lâkin Rusiye mahkemesi Aleksandr Sizikovnı cezasını tüzetüv müessisesinde keçire bilgen adam olaraq tanıdı, Aqmescitteki Rusiye SİZO-1-niñ tibbiy hadimleri onıñ bütün hastalıqları aqqında vesiqasını qabul etmeyip, eski olğanını aytqanlar. Tibbiy bölük Sizikovnıñ tibbiy teşkerüvini özleri keçirecekler, dep bildirdi.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Emil Ziyadinov, Zekirya Muratov, İsmet İbragimov, Alim Sufyanov, Seyran Hayredinov, Vadim Bektemirov mahkemede apiske alındı ve Aqmescitniñ ceza izolâtorına qapatıldı. I derece köz saqatı olğan Aleksandr Sizikov ev hapsine yollanıldı. Tutulğanlar Rusiyede yasaqlanğan «Hizb ut-Tahrir» diniy teşkilâtınen alâqaları bar olğanında qabaatlandı.
2023 senesi mayıs ayında Sizikov ilk dört yılnı apishanede keçirecek 17 yılğa üküm etildi. 2024 senesi sentâbrniñ 13-nde Rusiye Federatsiyasınıñ istinaf arbiy mahkemesi qırımlınıñ ükmüni deñiştirmedi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
