Qırımnıñ Rusiye kontrolindeki Bağçasaray rayon mahkemesi "Qırım musulmanları davası"nıñ kör figurantı Aleksandr Sizikovnı "poliske boysunmama" içün memuriy madde boyunca 10 künge apiske alğan. Bu aqta "Qırım birdemligi" cemaat birleşmesine advokat Emil Kurbedinov bildirdi.
Advokatnıñ aytqanına köre, evinde tintüv keçirilgeninden ve apiske alınğanından berli Sizikov Bağçasaray rayon mahkemesinde buluna.
Başta Kurbedinovğa binada yaqalanğan kişi yoq, dep ayttılar, onıñ davası boyunca malümat ise mahkemege kelmedi. Amma Kurbedinov yolnıñ qarşısındaki polis bölügine muracaat etkende, Rusiye quvetçileri, Sizikovnı mahkemege alıp ketkenlerini ayttılar. Bundan soñ advokat binağa qayttı, anda o "yaqında ketirildi" dep tasdıqladılar.
"Saşa qabaatını tanımadı. O, qarşılıq köstermegenini, ketmekni red etmegenini, eşyalarını toplağanını ayttı. Ve buña şaat bar edi, tintüv vaqtında anda bulunğan anası. Onıñ sözlerinden bir qaç patron qıdırğanlar, amma bir şey tapmağanlar. Bundan da ğayrı, protokol tizilgende ve poliske ketirilgende, onıñ vekâletlisi ya da işançlı şahsı yanında yoq edi. O, oña qarşı nasıl protokollar tizilgenini bilmey edi", — dedi advokat.
Onıñ aytqanına köre, protokol tizilgende Aleksandr Sizikov polis hadimlerine hastalığı aqqında malümat kirsetmesini rica etken. Yanında I gruppa saqatlığı, "tam soqurlıq" diagnozı ve diger hastalıqlarnı tasdıqlağan vesiqa bar edi.
Bundan ğayrı, imayeci, Sizikovnı Bağçasaraydaki Muvaqqat tutuv izolâtorına yerleştirecekler, dep qoştı. Bundan soñ, Kurbedinovnıñ tahmin etkenine köre, onı apishanege qaytaracaqlar.
Orta küz ayınıñ 21-nde Rusiyedeki Krasnoyarsk ülke mahkemesi "qırımlı musulmanlar davasınıñ" soqur mabüsi Aleksandr Sizikovnıñ azat etilmesinen bağlı qararnı lâğu etip, onı Qırımdaki evinden apishanege qaytarmağa qarar çıqardı.
"Qırım birdemliginiñ" uquqçısı Nazim Şeyhmambetov haber etkenine köre, istinaf mahkemesi Rusiye prokuraturasınıñ muracaatını qanaatlendirdi. Böyle qararnı talap etken qabaatlav tarafınıñ delilleri belli degil, çünki Rusiyeniñ Krasnoyarsk ülkesinde tasdıqlanğan Sizikovnıñ soqurlığı koloniyada tutulmasına mania olğan hastalıqlar cedvelinde bar.
Hatırlatamız, bu yıl mayısta Krasnoyarsk ülkesiniñ Minusinsk şeer mahkemesi Sizikovnı soqur olğanından azat etti, o, Qırımğa qayttı.
2020 senesi oraq ayınıñ 7-nde Rusiye quvetçileri yedi qırımtatarınıñ evini tintti: Emil Ziyadinov, Zekirya Muratov, İsmet İbragimov, Alim Sufyanov, Seyran Hayredinov, Vadim Bektemirov mahkemede apiske alındı ve Aqmescitniñ ceza izolâtorına qapatıldı. I derece köz saqatı olğan Aleksandr Sizikov ev hapsine yollanıldı. Tutulğanlar Rusiyede yasaqlanğan "Hizb ut-Tahrir" diniy teşkilâtınen alâqaları bar olğanında qabaatlandı.
2023 senesi mayıs ayında Sizikov ilk dört yılnı apishanede keçirecek 17 yılğa üküm etildi. 2024 senesi ilk yaz ayınıñ13-nde Rusiye Federatsiyasınıñ istinaf arbiy mahkemesi qırımlınıñ ükmüni deñiştirmedi.
