"Qırım musulmanları davası"nıñ kör figurantı Oleksandr Sizikov, Rusiye mahkemesi tarafından "Hizb-ut-Tahrir" teşkilâtına alâqası bar olğanında qabaatlanıp, 17 yılğa azatlıqtan marum etildi, reabilitasiya ve abilâsiya programmasınıñ resmiyleştirilmesi içün Minusinskiy apishanesinden Rusiyeniñ Krasnoyarsk vilâyetiniñ verem hastahanesine avuştırıldı.
Bu aqta "Qırım birdemligi" cemaat birleşmesine onıñ anası Yelena Sizikova bildirdi.
Onıñ aytqanına köre, körüvniñ bütünley ğayıp oluvından sebep erkek özü mektüpler yazıp oquyamaz. O, etrafındaki insanlarnıñ yardımına muhtac. Oğlunıñ mektüplerinden qadın, Oleksandr Sizikov eki kere reabilitasiya ve abiltasiya programması boyunca teşkerüvlerden keçkenini bildi.
Reabilitasiya ve abilâsiya programmasınıñ yekünlenmesi neticesinde saqatqa tibbiy-içtimaiy ekspertiza bürosı tasdıqlağan resmiy vesiqa berile. O, tibbiy, içtimaiy ve ihtisasiy tevsiyelerni cedvelge alacaq.
2020 senesi Oraqnıñ 7-nde Rusiye quvetçileri yedi Qırımtatarınıñ evini tintti: Emil Ziyadinov, Zekirya Muratov, İsmet İbragimov, Alim Sufyanov, Seyran Hayredinov, Vadim Bektemirov mahkemede apiske alındı ve Aqmescitniñ ceza izolâtorına qapatıldı. I derece köz saqatı olğan Aleksandr Sizikov ev hapsine yollanıldı. Tutulğanlar Rusiyede yasaqlanğan "Hizb ut-Tahrir" diniy teşkilâtınen alâqaları bar olğanında qabaatlandı.
2023 senesi Quralayda Sizikov ilk dört yılnı apishanede keçirecek 17 yılğa üküm etildi. 2024 senesi sentâbrniñ 13-nde Rusiye Federatsiyasınıñ istinaf arbiy mahkemesi qırımlınıñ ükmüni deñiştirmedi.