Aqmescit "Hiz but-tahriir" davasınıñ mabüsi Seytveli Seytabdiyevge Rusiye Federatsiyasınıñ Lipetsk vilâyetiniñ Yelts apishanesinde tibbiy yardım kösterilmey. Bu aqta Qırım.Aqiqat mühbiri qırımlınıñ tuvğanlarına esaslanıp bildire.
''Onıñ tibbiy yardımğa şikâyetlerine ekimler cevap bermey. Bir aydan ziyade o, cerrah ve köz ekimi körüşüvine barıp olamay. Dermatologğa barğan soñ, oña tam bir diagnoz qoyulmadı. Seytabdiyevni şiddetli qaşınuv raatsızlay, bu sebepten saç terisi qanğa qadar yırtıla, ve iç bir ilâc oña yardım etmey. Bundan ğayrı, siyasiy mabüsniñ bel ve tirsek ağrıları bar'', - dep aytıla haberde.
Syitabdiyevniñ aytqanına köre, taqiqat tedbirleri içün apishanege kelgen uquq qoruyıcı organlarınıñ hadimleri milletlerara ve diniy duşmanlıqqa esaslanğan ifadelerge yol bere bileler.
Qırımlı aş ve suv keyfiyetine de şikâyet etti. Apishanede mabüslerge sıq-sıq domuz etini bereler, bu sebepten Seytabdiyev tek ekim aşamağa mecbur, dep qayd ete "Qırım birdemligi".
2021 senesi sentâbr ayında Rusiyeniñ Cenübiy okrugınıñ arbiy mahkemesi Aqmescit "Hizb ut-Tahrir" davasınıñ mabüsleri Seitveli Seytabdiyev, Akim Bekirov, Rustem Seythalilov, Asan Yanikov ve Eskender Suleymanovnıñ apis müddetini 2021 senesi dekabrniñ 15-ne qadar uzattı.
2021 senesi mart ayında Kreml kontrolindeki Qırım Yuqarı mahkemesi Aqmescit ekinci "Hizb ut-Tahrir davasınıñ" figurantı Asan Yanikovnıñ apellâtsiyasını red etti. Advokat Safiye Şabanova Aqmescit Kiyev rayon mahkemesiniñ Yanikovnıñ dava malümatlarınen tanışuv aqqını sıñırlağan qararına apellâtsiya berdi.
2021 senesi fevralniñ 3-nde Vlasiha şeeriniñ Apellâtsiya arbiy mahkemesinde ekinci Aqmescitniñ "Hizb ut-Tahrir davasınıñ" mabüsleri Seytveli Seytabdiyev, Akim Bekirov, Rustem Seythalilov, Asan Yanikov ve Eskender Suleymanov oturışta Rusiye mahkemesiniñ terkibine ve prokurorğa qarşı çıqqanlarını bildirdiler.
2021 senesi yanvarniñ 18-nde Asana Yanikov ve ekinci Aqmescit "Hizb ut-Tahrir" davasınıñ diger figurantı Seitveli Seytabdiyevni Aqmescitten Rostov-na-Donu SİZOsına etap ettiler.
Martnıñ 27-nde Qırımda FSB, Rusiye İçki işler nazirligi ve Rosgvardiya hadimleri qırımtatar faalleriniñ, şu cümleden "Qırım birdemligi" cemaat birleşmesiniñ vekilleriniñ evlerinde tintüvler keçirdiler. Umumen 24 insan yaqalandı, olarnıñ arasında vatandaş jurnalistleri Osman Arifmetov, Rustem Şeyhaliyev, Remzi Bekirov.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
