"Qırım musulmanları davası"nıñ figurantı Riza Ömerov 13 yılğa azatlıqtan marum etilgen edi, o, Rusiye Federatsiyasınıñ Çuvaş Cumhuriyetiniñ Tsivilsk şeeriniñ koloniyasına etap etildi. Bu aqta "Qırım birdemligi" onıñ ömür arqadaşı Sevilâ Ömerovğa atıf etip bildire.
"Altı aydan soñ Rizanıñ sesini eşittim. Dekabr ayından berli laf etmedik. Birinciden, balalarnıñ sağlığı, ana-babalarnıñ sağlığı, menim sağlığım aqqında soradı. O pek qasevetlene. Er kesni, cemaaqa selâm etti ve tezden qaytıp, er kesnen körüşmege ümüt ete", — dep ayttı o.
2019 senesi iyünniñ 10-nda Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ sekiz erkek tutuldı: Ruslan Nağayev, Eldar Kantimirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Avropa elçileri mahkeme qararını takbih ettiler. Olar qırımlılarnı apisten azat etmege çağırdılar.
2021 senesi yanvarniñ 12-nde Rusiye mahkemesi Riza Ömerovğa 13 yıl sert rejimli koloniyada qalmasına üküm çıqardı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
