Rusiye tarafından 13 yılğa maküm etilgen qırımlı Oleg Födorovnıñ apis müddeti dörtünci kere uzatıldı. Bu aqta o, ömür arqadaşı İrina Födorovağa yazğan mektübinde bildirdi, dep haber etile "Qırım birdemligi"niñ Facebook saifesinde.
"Kelgeninen 10 kün berdiler, soñra 15. Ekinci müddeti bitmezden daa eki kere on beş kün berdiler", — dep tarif etti İrina.
Ceza izolâtorına yerleştirilmesiniñ sebebi belli degil.
Haber etilgenine köre, 2024 senesi noyabrniñ 29-nda qırımlını Udmurt Cumhuriyetiniñ Sarapul şeerine ketirdiler. Yelts apishanesinden Sarapul koloniyasına qadar yol 18 künni aldı.
Siyasiy mabüs kelgeninen SİZO-ğa (sert tutuv şaraitlerine) yerleştirildi. Tuvğanlarınıñ aytqanına köre, Födorovnı yañı koloniyağa şahsiy işindeki vesiqası ile beraber alıp ketkenler.
"Oña bu qararnıñ altında (vesiqanıñ kopiyasında) onıñ imzası bar, dep ayttılar, amma o imzalamadı ve bu qararnı daa evel körmegen edi", — dep tarif etti İrina Födorova.
2022 senesi iyül ayında Rostov-na-Donu Cenübiy okrug mahkemesi "Qırım musulmanları davası" boyunca üç qırımtatar faali Oleg Födorov, İsmet ve Ernest İbragimovğa üküm çıqardı.
İbragimov Ernest ve Oleğ Födorovnı makeme 13 yıl sert rejimli koloniyada qalmasına üküm etti. Olardan 3,5 yıl apis cezasını aldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
