Rusiye akimiyeti tarafından "Qırım musulmanları davası" boyunca mahküm etilgen Cebbar Bekirovnı Vladimirdeki 2-nci apishaneden etapqa alıp kettiler. Bu aqta "Qırım birdemligi"ne onıñ qadını Dilâra Bekirova bildirdi.
Onıñ malümatına köre, şimdi qırımtatar Sankt-Peterburgnıñ 6-ncı SİZO-sına buluna. O yerden onı Murmanskqa alıp ketecekler, amma ne vaqıt — belli degil.
Oraq ayında qırımlı Vladimir apishanesinde iş ekiminden tedaviylev talap etkenini bildirgen edi. Bekirovğa D vitaminini kötermek içün ilâclar da kerek edi, çünki apishanede az aşağanı içün onıñ eksikligi peyda olğan.
2021 senesi arman ayınıñ 7-nde Rusiye quvetçileri Qırımda birden beş qırımtatarnıñ evini tintti. Soñra faaller Rustem Murasov ve Rustem Tairov, Aqyarnıñ Balıqlava rayonında Cebbar Bekirov, Bağçasaray rayonında Zaur Abdullayev, Aqmescit rayonında Raif Fevziyev tutuldı.
"Qırım birdemligi" cemaat birleşmesi advokat Aleksey Ladinniñ malümatına esaslanıp, tutulğan qırımtatarlar "terror teşkilâtını quruv ve iştirak etüvden" şübheli sayıla, dep bildirdi.
Tutulğanlar siyasiy sebeplernen bağlı davalarnıñ mahkeme oturışuvlarına muntazam sürette iştirak ete, siyasiy mabüslerniñ qorantalarına yardım ete, öz köylerinde iftarlar ve kütleviy tedbirler teşkil ete ediler.
2023 senesi mayısnıñ 31-nde Rostov-na-Donu şeeriniñ Cenübiy okrugınıñ arbiy mahkemesi Fevziyevni 12 yıl sert rejimli koloniyada qalmasına üküm etti.