"Qırım musulmanları davası"nıñ figurantı Arsen Abhairov Ulan-Ude No8 Rusiye tüzetüv cezahanesinde tutulğan şarait aqqında tarif etti. Bu aqta "Qırım birdemligi" haber ete.
Advokatnıñ bildirgenine köre, Abhairov sıq-sıq tiş ağrısıdan ve ihtisaslı stomatologik yardımnıñ olmamasından şikâyet ete. Bundan da ğayrı, qırımlı cezahanede tedaviylev keçirilgen sanitar şaraitke de işanmay, anda mahbüslerniñ daimiy aqımı içün bir bormaşina çalışa.
Daa yahşı şaraitli hastahanege tek acele sürette ketireler, şunıñ içün qırımlı anda kiremez, dep tarif etti advokat. Ağrını bastırmaq içün Abhairov ağrı kesici içe.
Bundan da ğayrı, qırımlınıñ varikoz hastalığı da bar. Tedbirden soñ hastalığı keskinleşti. Cezahanede berilgen aşlarnı pek az aşay. Abhairov advokatqa er türlü etten tamamen vazgeçkenini ayttı, amma sebebini añlatmadı.
Faallerniñ qayd etkenine köre, Abhairov onı evge yaqın olğan cezahanege avuştırılması içün küreşe. Bu dava ise Moskvanıñ mahkemesinde 10 ay devamında baqılmay.
Abhairovnıñ apis müddeti 2024 senesi yanvarniñ 12-nde bitti.
Arsen Abhairov ve daa eki qırımtatar Eskender Abdulganiyev ve Rustem Emiruseinov 2019 senesi fevral ayında Qırımnıñ Qurman rayonınıñ Büyük-Onlar qasabasında tutuldı. Rusiye FSB-sı qırımlılar Rusiyede ve işğal etilgen Qırımda yasaq etilgen "Hizb ut-Tahrir" teşkilâtınıñ faaliyetine alâqası bar, dep iddia ete edi.
Noyabrniñ 3-nde Rusiyeniñ Rostov-na-Donu şeerindeki Cenübiy okrugınıñ arbiy mahkemesi Qurman "Hizb ut-Tahrir" davasınıñ üç mabüsini 42 yılğa apiske aldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
