Verem hastası olğan "Qırım musulmanları davası" mabüsi alı Tofik Abdülgaziyevniñ alı fenalaştı — sıcağı yüksrk, öksürik ve nefes qıtlığı bar, kerekli tedaviylevni almay. Bunı o, ömür arqadaşı Aliya Abdülgaziyevağa bildirdi.
Abdulgaziyevanıñ aytqanına köre, eki aydan berli o, aqayınıñ tibbiy vesiqalarını ve tedaviylenüvine dair resmiy qararlarnı almağa tırışa, amma er sefer red etile. Telefondan oña "er şey yahşı" dep aytalar, amma Tofiknen laf etkende, onıñ sesinde zayıflıq duya ve laf etüvde toqaluvlarnı qayd ete.
"Bir afta içinde onıñ sıcağı köterilip başladı, özüni yaramay duya. Ekim virusqa qarşı "Kagotsel" ilâc berdi. Başqa ilâclar ve tibbiy areketler qullanılmadı. Daa soñra pek öksürmege ve nefesi tutulıp başladı", — dep bildirdi qırımlınıñ apayı.
Tofik Abdülgaziyev apiske alınmazdan evel qırımlı siyasiy mabüslerniñ balaları içün tedbirlerniñ teşkil etilmesinde iştirak ete edi. "Qırım birdemligi" cemaat birleşmesiniñ faali, ses operatorı, "Qırım balalığı" leyhasınıñ iştirakçisi edi.
Bundan ğayrı, siyasiy mabüslerge SİZO-ğa aşayt mallarını berüvnen oğraşa, siyasiy sebepler ile açılğan davalar boyunca mahkemelerge bara, evlerinde tintüv keçirilgen semetdeşlerine qol tutmağa kele edi.
2019 senesi mart ayınıñ soñunda uquq qoruyıcılar Qırım musulmanları Tofik Abdülgaziyev, Mecit Abdurahmanov, Vladlen Abdülkadırov, İzet Abdullayev ve Bilâl Adilovnı yaqaladılar. Bu künü FSB hadimleri bir kereden Qırımnıñ 25-ten ziyade sakininiñ evinde tintüv keçirdi. Bu soñki on yıl içinde qırımtatarlarnıñ evlerinde keçirilgen eñ kütleviy tintüvler oldı.
2022 senesi mayıs ayında Rostov-na-Donunıñ Cenübiy okrugınıñ arbiy mahkemesi ekinci Aqmescit «Hizb ut-Tahrir davasınıñ» mabüsleri Tofik Abdulgaziyev, Vladlen Abdulkadırov, İzzet Abdullayev, Mecit Abdurahmanov ve Bilâl Adilovnıñ qabaatlayıcı ükümlerini çıqardı. Müddetleri – 12 yıldan 14 yılğa qadar.
«Memorial» aq qorçalayıcı merkezi 2019 senesi martnıñ 27-nde Qırımda tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
