Rusiyede apis cezasına mahküm etilgen "Qırım musulmanları davası" mabüsi Arsen Abhairovğa varikoznı verem hastaları içün hastahanede tedaviylemege teklif eteler. Bunı "Qırım birdemligi" cemaat birleşmesi haber etti.
"Qırımtatarda apishanede varikoz peyda oldı, hirurgik operatsiya kerek. Cezahane müdirligi №1 Krasnoyarsk verem hastahanesinde ameliyat yapmağa teklif ete", - dep yazıla bildirmede.
Advokat Mariya Terehovanıñ sözlerine köre, bu hastahane aqqında pek çoq menfiy fikir bar eken.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
2020 senesi noyabrniñ 3-nde saba Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davasınıñ» üç mabüsi Rustem Emiruseinov, Arsen Abhairov ve Eskender Abdulganiyevni 17, 13 ve 12 yılğa üküm etti. Olar qabaatlarını tanımadı. Mahküm etilgen qırımlılarnıñ advokatları ükümni şikâyet etip, Avropa insan aqları mahkemesine barmağa niyetlene.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
