Rusiye mahkemesi tarafından 15 yılğa azatlıqtan marum etilgen "Qırım musulmanları davası"nıñ figurantı Ruslan Zeytullayevni Rusiyeniñ Başqırstannıñ Salavat şeerindeki sert rejimli koloniyasınıñ ceza izolâtorından azat ettiler. Bu aqta advokat Emil Kurbedinovğa atıf etip, "Qırım birdemligi" haber ete.
Advokatnıñ bildirgenine köre, Zeytullayev tahminen 40 kün izolâtorda tutuldı. Ruslan sağlığından şikâyet etmedi. O, koloniya hadimlerine onı tiş ekimi ziyaret etmesini rica etti. Qırımlınıñ aytqanına köre, Rusiye koloniyasınıñ hadimleri oña ekimge barmağa imkânı olacağını vade ettiler.
2015 senesi yanvar ayında FSB hadimleri Zeytullayevlerniñ evine kirdiler ve tintüvden soñ aile başını tuttılar.
2016 senesi Ruslan Zeytullayev Rusiye mahkemesi tarafından "Hizb ut-Tahrir" diniy teşkilâtınıñ bölügini qurğanında qabaatlanıp mahküm etildi.
2017 senesi iyül ayında Rusiye Yuqarı mahkemesi Zeytullayevniñ apis cezasını 15 yılğa qadar arttırdı. Buña cevap olaraq Aqyarlı açlıq ilân etti.
Ukrayina Tış işler nazirligi Rusiye Yuqarı mahkemesiniñ apis müddetini arttırmasına qarşı narazılıq bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
