Soqur olğanından birinci grupa saqatı olğan "Qırım musulmanları davası"nıñ figurantı Aleksandr Sizikovnı Aqmescitniñ iç bir tahqiqat izolâtorında tapıp olamaylar.
Bu aqta "Suspilne Krım" Sızikovnıñ imayesine atıf etip bildire
Qayd etilgenine köre, imayeciler müvekkilini Bağçasaraydaki muvaqqat tutuv izolâtorında tapmağa tırışalar.
Ukrayina Yuqarı Radasınıñ insan aqları vekâletlisi Dmıtro Lubinets bildirdi ki, "Rusiye quvetçileriniñ saqatlarğa qarşı areketleri esas insan aqlarını, hususan adaletli mahkeme ve qoruv aqqını boza".
O, dünya toplulığını Rusiyege qarşı basqını quvetleştirmege ve "Aleksandr Sizikovnı, em de Qırım ve Rusiye Federatsiyasında qanunsız tutulğan bütün ukrayinlerni" acele azat etmesine çağırdı.
Bir kün evelsi "Qırım birdemligi" uquqçı Lilâ Gemeciniñ malümatına esaslanıp, Rusiye quvetçileri Sizikovnı tutıp, belli olmağan yerge alıp ketkenlerini bildirgen edi. 2020 senesinden berli qırımlı ev apsinde tutula edi, amma sentâbrniñ 13-nde Rusiye mahkemesi oña 17 yıl apis cezasını belgiledi.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Emil Ziyadinov, Zekirya Muratov, İsmet İbragimov, Alim Sufyanov, Seyran Hayredinov, Vadim Bektemirov mahkemede apiske alındı ve Aqmescitniñ ceza izolâtorına qapatıldı. I derece köz saqatı olğan Aleksandr Sizikov ev hapsine yollanıldı. Tutulğanlar Rusiyede yasaqlanğan «Hizb ut-Tahrir» diniy teşkilâtınen alâqaları bar olğanında qabaatlandı.
2023 senesi mayıs ayında Sizikov ilk dört yılnı apishanede keçirecek 17 yılğa üküm etildi. 2024 senesi sentâbrniñ 13-nde Rusiye Federatsiyasınıñ istinaf arbiy mahkemesi qırımlınıñ ükmüni deñiştirmedi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
