Rusiye makemesi tarafından "Qırım musulmanları davası" boyunca 11 yılğa azatlıqtan marum etilgen qırımtatar faali Yaşar Şihametovnı Rusiye Federatsiyasınıñ Saratov vilâyetindeki Balaşov şeerindeki apishanede hastahanege yerleştirdiler. Bu aqta "Qırım birdemligi" cemaat birleşmesi onıñ ömür arqadaşı Lilâ Şihametovağa atıf etip bildire.
Onıñ aytqanına köre, Yaşarnı büyrek ve bel ağrısı raatsızlay.
"Onıñ alı fenalaşqanmı ya da sağlığındaki hronik problemler sebebinden hastahanege yatqızılğanmı, Yashar añlatmadı", — dep tarif etti qırımlınıñ qadını.
Rusiye Federatsiyasınıñ FSİN hadimleri vaziyetni izaatlamadı.
2021 senesi kiçik aynıñ 17-nde Qırımda Qarasuvbazar, Bağçasaray, Aqmescit, Aqyar ve İçki rayonında kütleviy tintüvler keçirildi. Lenur Seydametov, Timur Yalkabov, Azamat Eyupov, Yaşar Şihametov, Ernest İbragimov ve Oleg Fedorov evlerinde keçirilgen tahqiqat tedbirlerinden soñ Qırımdaki FSB idaresine ketirildi. Soy-soplarına FSB tahqiqatçıları tutulğanlar Rusiye Ceza kodeksiniñ 205.5 maddesine istinaden qabaatlana. Qırımtatarlar Rusiyede yasaqlanğan, amma Ukrayınada ve bir çoq memlekette milliy qanunlar seviyesinde sıñırsız çalışqan «Hizb ut-Tahrir» teşkilâtı ile alâqaları bar olğanında qabaatlandı.
2022 senesi ilk küz ayınıñ 9-nda Rostov-na-Donu Cenübiy okrugınıñ arbiy mahkemesi Yaşar Şihametovnı terrorizmde qabaatlap, 11 yılğa azatlıqtan marum etti.
Aq qorçalayıcılarnıñ fikirince, teşkilât azalarını ükümet devrimini azırlav ve terrorizm içün degil, firqa tarafdarlarınıñ Qırımda siyasiy repressiyalarğa qarşı cemaat aktsiyaları, Rusiye akimiyetini tenqit etkenleri ve qırımtatarlar 2014 senesi işğalge qarşı çıqqanları içün taqip eteler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
