14 yıl apis cezasına mahküm etilgen Qırımdan din adamı ve çoq balalı baba Bilâl Adilov umumiy tutuv şaraitten sert şaraitke keçirildi. Bu sebepten yollama, telefon ve körüşüv sayısı azlatıldı, dep bildirdiler "Qırım birdemligi" cemaat birleşmesinde.
Advokat Mariya Terehovanıñ sözlerine köre, mudiriyet 2019 senesi SİZO-da Adilov 12 künge kartserge alınğanına esaslana. Advokat apishane reberliginiñ bu areketleri qanunsız ola ve memuriyet qararını şikâyet etecek ola.
Sert şarait sebebinden Bilâl Adilovnıñ uzun körüşüvleri yılda 1 kere ve qısqa körüşüvler yılda 2 kere olacaq. Amma büyük nevbetten sebep bu imkândan bile faydalanıp olamaycaq.
"Bu apishane temiz, dep qayd etti o. Kameralarnıñ pencereleri bar ve avalana. Amma müessiseniñ künü pek sert. Serbest vaqtı olğanda kitap oquy ve şiir yaza", – dep bildirdi advokat.
Bilâl Adilov – altı bala babası, din erbabı. Apiske alınmazdan evel bir qaç yıl devamında qırımtatar halqınıñ cemaat yaşayışında faal iştirak etti, mahkeme, tintüvlerge bardı, siyasiy mabüslerniñ qorantalarına yardım etti.
2022 senesi mayısnıñ 12-nde Rostov-na-Donudaki Cenübiy okrugınıñ arbiy mahkemesi qırımtatarlarnı «Hizb ut-Tahrir» teşkilâtına alâqası bar olğanında qabaatladı. Bilâl Adilov, Tofik Abdulgaziyev, Vladlen Abdulkadırov, İzzet Abdullayev ve Mecit Abdurahmanov umumen 62 yılğa azatlıqtan marum etildiler.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
