Rusiye mahkemesi tarafından "Qırım musulmanları davası" boyunca 17 yıl apis cezasına mahküm etilgen qırımtatar vatandaş jurnalisti Timur İbragimovnıñ Rusiye cezahanesinde sağlığı zayıflaştı.
Bunıñ aqqında "Qırım birdemligi" vatandaş jurnalistiniñ ömür arqadaşı Dilâra İbragimovağa atfı etip bildire.
Onıñ sözlerine köre, İbragimovda yañı bir hastalıq tapqanlar – holelitiaz diagnozı qoyulğan. İbragimov ultrases talili içün hastahanege ketirilmek ve ekim tarafından baqılmaq içün yarım yıl beklegen.
Bundan ğayrı körme ile bağlı qıyınlıqlar alâ daa bar. Timur İbragimov III gruppa saqatı, onıñ bir közü yoq, ekimler onı suniy közge deñiştirdiler. Apishane şaraitinde ise körme qabiliyeti pek zayıflaştı, köz ilâclarına daimiy ihtiyacı bar.
Dilâranıñ qayd etkenine köre, aqayı bir yıl evelsi Başkortostan SİZO-sından Râzan cezahanesine etap etilgen soñ 27 kilo azğan.
RF Federal ceza hızmetiniñ hadimleriniñ Timur İbragimovnıñ sağlığı ile bağlı resmiy izaatları şimdilik yoq.
2017 senesi oktâbr ayında Rusiye uquq qoruyıcıları altı Bağçasaray sakinini tututı. Timur İbragimov, Marlen Asanov, Memet Belâlov, Seyran Saliyev, Server Zekiryayev i Ernes Ametov. Rusiye FSBsi olarnı Rusiyede ve işğali altındaki Qırımda yasaqlanğan «Hizb ut-Tahrir» teşkilâtında iştirak etkenlerinde qabaatladı.
Rusiyeniñ Rostov-na-Donu şeerindeki Cenübiy okrugınıñ arbiy mahmekesi 2020 senesi sentâbr ayında Bağçasaraydaki ekinci «Hizb ut-Tahrir davası» boyunca üküm çıqardı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
