"Qırım musulmanları davası" boyunca Rusiye mahkemesi tarafından 17 yıl apis cezasına mahküm etilgen bala idmancısı Emil Ziyadinov Rusiyeniñ Lipetsk vilâyetiniñ Yelets şeerine etap etildi. Bunı "Qırım birdemligi" cemaat birleşmesi haber ete.
Siyasiy mabüsniñ sözlerine köre, 2022 senesi dekabrniñ 26-nda o Lenur Seydametovnen (o da Rusiyede yasaq etilgen "Hizb ut-Tahrir" diniy teşkilâtta iştirak etüvde qabaatlandı - QA) beraber Novoçerkasktaki SİZO-dan çıqarılğan. Trennen olarnı Voronejge ketirgenler, bir künden soñ ise Lipetske yollağanlar.
Yanvarniñ 10-nda Ziyadinov ve Seydametov Yelets şeeriniñ apishanesine etap etildiler, şimdi olar eki aftalıq karantindeler.
"Kamera yahşı, qanun qoruyıcılarnıñ munasebeti de nezaketli. Bir kamerada üç kişimiz. Bugün kezintige ve amağa bardıq. Amam yahşı, aftada eki kere baramız", - dedi Ziyadinov.
Rusiyeniñ Rostov-na-Donudaki mahkemesi Qırımdan bala idmancısı Emil Ziyadinovnı 17 yıl apis cezasına mahküm etti.
«Memorial» aq qorçalayıcı merkezi halqara kriteriylerge esaslanıp, «Hizb ut-Tahrir davasınıñ» mabüsi Emil Ziyadinovnı siyasiy mabüs dep tanıy. Bu aqta aq qorçalayıcı teşkilâtnıñ saytında derc etilgen beyanatta aytıla.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Qurman rayonınıñ Büyük Onlar qasabasında Emil Ziyadinov, Aqmescit rayonınıñ Kurtsı qasabasında İsmet İbragimov, Bağçasaray rayonınıñ Jeleznodorojnoye köyünde Alim Sufyanov, Bağçasaray rayonınıñ Süyür Taş (Belokamenka) köyünde Seyran Hayretdinov, Bağçasaray rayonınıñ Sevastyanovka köyünde Aleksandr Sizikov, Aqmescit rayonınıñ Bavurçı (Kamenka) köyünde Vadim Bektemirov ve Aluştada Dilâver Memetovnıñ. O, tintüv keçirilgende evde degil edi, onı qıdırmağa devam eteler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
