Qırım Muhtar Cumhuriyeti ve Aqyar şeeri prokuraturası kollaboratsionizm faaliyeti boyunca 200-den ziyade cinaiy davanı tahqiq ete. Bu aqta Qırım Muhtar Cumhuriyeti prokuraturasınıñ yolbaşçısı İğor Ponoçevnıy ''Ğromadske radio'' içün bergen izaatında bildirdi.
"Qırımda kollaboratsionizm faaliyetiniñ eñ kütleviy çeşitleri - işğal akimiyet organlarında memuriy vazifelerde göñülli çalışmaq, em de duşman ile işbirlikte hocalıq faaliyeti", - dep tarif etti o.
Qayd etilgenine köre, muhtariyetniñ uquq qoruyıcı organları 200-den ziyade cinaiy davanı tam buadiseler boyunca tahqiq ete (Ukrayina Ceza kodeksiniñ 111-1 maddelerine istinaden).
''Prokurorlar er bir böyle adisege ayrı yanaşa. İşğal akimiyet ya da Rusiye ordusı ile doğrudan işbirlik yapqan mallar ya da hızmetler bergen bizneslerge prioritet berile. Biz yalıñız vatandaş ealisiniñ yaşayış ihtiyaclarını qanaatlendirmek içün çalışqan biznesni cinaiy mesüliyetke çekmeymiz", - dep qayd etti Qırım prokuraturasınıñ yolbaşçısı.
Daa evel belli olğanı kibi, Qırım Muhtar Cumhuriyeti ve Aqyar prokuraturası Qırımnıñ 155 sakinini kollaboratsionizm faaliyetinde şekley.
Ukrayina prezidentiniñ Qırım Muhtar Cumhuriyetindeki temsilcisi Tamila Taşeva bildirdi ki, "Qırımnıñ işğalden azat etilmesinden soñ Ukrayinanıñ esas vazifelerinden biri - yarımadanıñ Rusiye tarafından ilhaqına yardım etkenlerni tapmaq ve mesüliyetke çekmek olacaq". Onıñ aytqanına köre, insanlıqqa qarşı cinayetlerni ve arbiy cinayetlerni yapqanlar, insan aqlarını bozğanlar ve genotsid kibi tanılğan cinayetlerni yapqanlar mesüliyetke çekilmeli.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
