Qırım Muhtar Cumhuriyetiniñ prokurorı vazifesine İgor Ponoçovnıynı tayin ettiler, dep bildire QMC Prokuraturasınıñ matbuat hızmeti.
Berilgen malümatqa köre, müessiseniñ yañı yolbaşçısını oktâbrniñ 23-nde Ukraina baş prokurorınıñ muavini Günduz Mamedov taqdim etti.
«Qırım Muhtar Cumhuriyeti Prokuraturasınıñ yolbaşçısı işançlı reber, müessise işiniñ hususiyetlerini añlağan insan olmaq kerek. İgor Ponoçovnıy 2017 senesinden berli muhtariyetniñ prokuraturasında çalıştı, bölük yolbaşçısınıñ muavini vazifesinden prokuror muavini vazifesine qadar yol keçti. Bu müddet içinde özüni Qırım Muhtar Cumhuriyetiniñ işğalden qurtuluvı ve reintegratsiyası yolunda müessise işini semereli yapqan mütehassıs olaraq kösterdi», – dep qayd etti Mamedov.
Ponoçovnıy, işğal etilgen Qırımda insan aqlarınıñ bozuluvını tahqiq etmege devam etecek, dep vade etti.
«Bizler 2019-2021 seneleri vaqtınca işğal şaraitlerinde Qırım Muhtar Cumhuriyeti Prokuraturasınıñ İnkişaf strategiyasına köre plan ve vazifelerni yapmağa devam etecekmiz. Vaqtınca işğal etilgen yarımadada insan aqlarınıñ bozuluvı diqqatsız qalmaycaq, qabaatlılar em milliy, em halqara seviyelerde mesüliyetke çekilecek», – dep qad etti Ponoçovnıy.
Daa evel haber etilgeni kibi, Qırım Muhtar Cumhuriyetiniñ sabıq prokurorı Günduz Mamedov Ukraina baş prokurorı Ruslan Râboşapkanıñ muavini olaraq tayinlendi.
İgor Ponovoçovnıy 1987 senesi oktâbrniñ 7-nde Kyiv vilâyeti Rokitnânskıy rayonınıñ Ostrov köyünde dünyağa keldi. 2009 senesi Yaroslav Mudrıy Ukraina milliy uquq akademiyasını bitirdi. 2009 senesi Kyiv Darnitskıy rayonınıñ prokuror yardımcısı olaraq karyerasını başlağan edi.
2017 senesi Qırım Muhtar Cumhuriyetiniñ prokuraturasında çalışmağa başladı: başta organ ve protsessual reberlikniñ tahqiqatçıları cinaiy davalarınıñ tahqiqatları boyunca idareniñ yolbaşçı muavini vazifesinde. Soñra ise cinaiy tahqiqat nezaretiniñ idaresinde yolbaşçılıq yaptı.
2018 senesi iyün ayında Qırım Muhtar Cumhuriyetiniñ prokuror muavini vazifesine tayin etildi.
2019 senesi oktâbrniñ 22-nde Ukraina baş prokurorınıñ buyruğınen Ponoçovnıy Qırım Muhtar Cumhuriyetiniñ prokurorı oldı.
