Qırım Muhtar Cumhuriyetiniñ prokuraturası Qırımnıñ Rusiye saylav komissiyasınıñ yolbaşçısını qıdıruvğa ilân etti. Müessise malümatına köre, oña devlet hainliginden ve Ukraina topraq bütünligine qast etüvden şübheli sayılğanı haber etildi.
«Mahkeme Qırım Muhtar Cumhuriyetiniñ Prokuratura muracaatını qanaatlendirip, cinaiy mesüliyetten qaçqan «Saylav komissiyasınıñ» yolbaşçısına nisbeten mahsus mahkemeden evel tahqiqat keçirmesine izin berdi. Böylece, mahkeme şübheliniñ cinaiy mesüliyetke çekilmesine (in absentia), yani faktik olaraq olmasa da izin berdi», – dep aytıla haberde.
Müessiseniñ qayd etkenine köre, qıdıruvğa ilân etilgen saylav komissiyasınıñ reisi 2014 senesi martnıñ 16-nda yarımadada «referendum» keçirilmesini temin etken edi.
Qırımnıñ Rusiye saylav komissiyasınıñ saytında olğan malümatqa köre, onıñ reisi Mihail Malışev ola.
Bundan evel Ukraina halq deputatı, «Yevropeyska solidarnist» fraktsiyasınıñ reislerinden biri İrına Ğeraşçenko Ukraina Yuqarı Radasını Qırımda keçirilecek Rusiye saylavlarınıñ neticelerini tanımamasına çağırdı.
Rusiye akimiyeti 2019 senesi sentâbrniñ 8-nde Qırım ve Aqyarda Qırım parlamenti ve yerli şura deputatlarınıñ saylavlarını keçirmege planlaştıra. Ukraina, ABD, AB ve bir sıra dünya memleketi işğal altındaki yarımadada Rusiye tarafından saylavlarnıñ keçirilmesini qanunsız tanıycaq.
