Qırım Muhtar Cumhuriyetiniñ prokuraturası Rusiye işğal etken Qırımda medeniy miras monitoringi boyunca usuliy tevsiyelerni taqdim etti.
Müessiseniñ matbuat hızmeti bildirgenine köre, leyha mesleatçıları «işbu saadaki bozuvlarnıñ tolu qaydı ve yarımadada halqara cinayetlerniñ delillerini toplav usulına pek tesir etken medeniy miras qoruvınıñ tertibine dair halqara ve çetel qanunlarınıñ hususiyetleri aqqında malümat berdi».
Müessise malümatına köre, taqdim mirasimi «Vozrojdeniye» halqara fondunıñ destegi ile keçirilgen «Silâlı zıddiyet şaraitlerinde halqara gumanitar uquqınıñ normalarını bozuv: medeniy mirasnı saqlav» leyhası çerçivesinde olıp keçti.
Keçken sene oktâbr ayında Ukrainanıñ beşinci prezidenti Petro Poroşenko UNESCO İcra şurası Rusiye işğal etken Qırımdaki vaziyetniñ doğru monitoringini başlattı, dep bildirgen edi.
Qırım işğalinden soñ Rusiye Qırımdaki medeniy ve tarihiy miras yerlerini öz uquqı altına aldı. Kyiv diqqatqa lâyıq yerler Ukraina halqına ait olğanını israr etip, olarnı UNESCO imayesi altına qabul etmege rica ete.
UNESCO Dünya mirası cedveline işğal altındaki «Hersones Tavriçeskiy» qoruğı kirmekte. Cedvelge Bağçasaraydaki Han sarayı, Sudaqtaki Cenevizler qalesi, Qırım astrofizik observatoriyası, Manğup Qale, Eski Kermen ve Çufut Qale kirsetile bile.
