Qırım Muhtar Cumhuriyetiniñ prokuraturası Aqmeçit rayonınıñ sakini Nariman Nejmudinovnıñ Noman Çelebicihan «qırımtatar batalyonında» iştirak etkeninden şübheli sayılıp tutulğanı ve apiske alınğanı içün cinaiy tahqiqat başlattı. Bu aqta müessiseniñ matbuat hızmeti bildire.
«Vaqtınca işğal etilgen yarımadada Ukraina vatandaşınıñ azatlıqtan qanunsız marum etilüvi sebebinden Ukraina Ceza kodeksiniñ 146-ncı maddesiniñ 2-nci qısmına istinaden cinaiy tahqiqat başlatıldı», – dep aytıla haberde.
Müessiseniñ bildirgenine köre, mahkemeden evelki tahqiqatnı Qırım Muhtar Cumhuriyeti ve Aqyardaki Milliy politsiya idaresi keçire.
Rusiye FSBsi fevralniñ 17-nde işğal etilgen Qırımda «N.Çelebicihan qanunsız silâlı batalyonında iştirak etkeninden» şübheli sayılğan Aqmeçit rayonınıñ sakinini tuttı, dep bildire. Er adam apiske alındı.
«Asker» cemaat teşkilâtınıñ reisi Lenur İslâmovnıñ bildirgenine köre, Noman Çelebicihan «qırımtatar batalyonında» Qırımda Rusiye quvetçileri tarafından tutulıp apiske alınğan Aqmeçit rayonınıñ sakinini tanımaylar.
Qırımtatar faalleriniñ malümatına köre, tutulğan kişiniñ adı – Nariman Nejmudinov.
2019 senesi yanvar ayında Rusiye kontrolindeki Qırımnıñ Yedi Quyu rayon mahkemesi 24 yaşında Qırım sakini Fevzi Sagancini «Ukrainada qanunsız silâlı birleşmede iştirak etkeninde» qabaatlap üküm çıqardı.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete.
Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.
«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
