Qırım Muhtar Cumhuriyetiniñ prokuraturası, cuma künü, martnıñ 27-nde, BM Qırımnıñ Rusiye tarafından ilhaq etilüvini qabul etmegenine dair qararnı qabul etkeninden tam altı yıl keçti, dep hatırlattı. Bu aqta müessiseniñ Facebook saifesinde aytıla.
«Tam altı yıl evelsi, 2014 senesi martnıñ 27-nde, Ukraina ve bir sıra ileri dünya memleketiniñ teşebbüsinen, BM Baş Assambleyasınıñ 68-inci sessiyasında reylerniñ ekseriyetinen (11-ge qarşı 100 rey) Ukraina topraq bütünliginiñ onıñ halqara seviyedeki sıñırlarda tanıluvına dair qarar qabul etildi. BM Baş Assambleyası, Rusiye tarafından Ukraina toprağınıñ, hususan Qırım yarımadasınıñ silâlı işğali meselesini muzakere etmek içün mahsus toplaşqan edi», – dep aytıla haberde.
Qırım Muhtar Cumhuriyetiniñ prokuraturası, iç bir halqara teşkilât Qırım ve Aqyar ilhaqını qabul etmedi, dep bildirdi, şunıñ içün «halqara seviyede tanılğan sıñırlar» ıstılası Qırımnı tek Ukraina toprağı olaraq tanıtmağa imkân bere.
«BM Baş Assambleyasınıñ qararı sahte Qırım «referendumını» da tanımay. İşbu qarar ileride halqara istilâ ve işğal tanılması içün bir temel, bütün dünya memleketlerine ve halqara teşkilâtlarğa Ukraina topraq bütünligine olğan destekniñ bir timsali oldı», – dep bildire müessise.
Hatırlatamız, 2019 senesi dekabrniñ 9-nda BM Baş Assambleyası Rusiyeni Qırımdan ordusını çıqarmasına çağırğan qararnı qabul etti.
Daa evel Birleşken Milletler, baş kâtip António Guterresniñ işğal etilgen Qırımda insan aqlarınıñ bozuvlarına dair birinci maruzasını aydınlattı. Maruza metni teşkilâtnıñ saytında derc etildi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
