Qırım Muhtar Cumhuriyeti ve Aqyar Milliy politsiyası Baş idaresiniñ Tahqiqat bölügi fevralniñ 14-nde saba Rusiye uquq qoruyıcıları evinde tintüv keçirgen qırımtatarlarnıñ mesken tiyilmemezligi bozulğanından sebep cinaiy tahqiqat başlattı. Bu aqta QMC Milliy politsiyasınıñ matbuat hızmeti bildire.
«Ukraina Ceza kodeksiniñ 162-nci maddesiniñ 2-nci qısmına istinaden cinaiy tahqiqat başlatıldı, beş yılğa qadar apis cezası berile. İşbu cinaiy tahqiqatnı Qırım Muhtar Cumhuriyetiniñ Prokuraturası idare ete», – dep aytıla haberde.
Daa evel Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları qırımtatarlarnıñ evlerini tinte, dep haber etilgen edi. «Qırım birdemligi» birleşmesiniñ malümatına köre, Aqmescitteki FSB idaresine Eskender Abdulğaniyev, Arsen Abhairov ve Rustem Emirüseinov alıp ketirildi.
Rusiye FSBsi, Qırımda «Hizb ut-Tahrir» teşkilâtınıñ bölügini qurğanından ve anda iştirak etkeninden şübheli sayılğan üç insannıñ evinde tintüv keçirdi, dep bildire.
Qırım.Aqiqat tafsilâtlı malümat almağa tırışa.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
