Qırım mekteplerinde ana-babalarnı ana tili yerine rus tilini saylamaları içün qandıralar. Böyle fikrini qırımlı adliyeci ve aq qorçalayıcı Lenura Yengulatova Qırım.Aqiqat Radiosınıñ yayınında bildirdi.
Yengulatovanıñ aytqanına köre, 2017 senesiniñ soñunda Qırımda mektep ve bala bağçalarında ana tilini ögrenmek içün «yol haritası» qabul etilgen edi. Oquv yurtlarınıñ memuriyetleri ana-babalarğa bu imkân aqqında haber etmek kerek edi.
«Bugünki künde, hususan avgustnıñ soñunda – sentâbrniñ başında köremiz ki, ana-babalarğa memuriyetniñ büyük basqısı altında ögrenüv tili olaraq ana tilini saylamamaları içün arizalar berile. Ana-babalar arasında yañlış malümat bergen büyük informatsion programma yapıla: ana tilini ögrenmek qıyın eken, devlet imtianları rusça berile ve ana tiline bir saat kerek, onı da rus tili derslerinden alacaq ekenler», – dedi Yengulatova.
İşğal etilgen Qırım müessiseleriniñ bu malümatnen bağlı cevabı şimdilik olmadı.
Daa evel Aqyarnıñ Rusiye akimiyeti şeer mektepleriniñ talebeleri yañı oquş yılında ukrain tilini ögrenmege başladı, dep bildirdi. Ders mecburiy degil – onı istegenler ala, dep israr ete Rusiye kontrolindeki şeer ükümeti.
İşğal etilgen Qırımnıñ Rusiye akimiyeti umumtasil mekteplerde qırımtatar ve ukrain tilleriniñ derslerini qısqarttı. Qırımtatar Milliy Meclisiniñ vekilleri qırımtatarlar ana tilini mekteplerde ögrenmek imkânından marum qala, dep bildirgen edi.
Yarımada işğalinden soñ qabul etilgen «Qırım Cumhuriyeti anayasasınıñ» 10-uncı maddesi qırımtatar, ukrain ve rus tillerine devlet tili statusını bermekte.
Qırımdaki Ukrain medeniyet merkeziniñ faali Leonid Kuzminniñ malümatına köre, yarımadada işğalden evel çalışqan 7 ukrain mektebinden bir danesi bile qalmadı.
Qırımtatar Milliy Meclisiniñ azası Eskender Bariyev yarımadada qırımtatar tilinde tasil bergen 16 mektepten yedisi qaldı, dep haber etken edi.
