Rusiye nezaretindeki Qırım akimiyeti yarımada ilhağınıñ beş yıllığına bağışlanğan medalni tesis etti. Böyle qarar dekabr 26-sında oturışta qabul etildi.
Bu medal “cesaret, qaramanlıq, küçlü siyasiy faaliyet ve “Qırımnıñ Rusiye ile birleşmesi”ne şahsiy isse qoşuv; 2014 senesi mart 16-sı referendumnıñ azırlav ve keçirüvinde iştirak etüv; Qırım cumhuriyeti sakinleriniñ ayat ve uquq qoruvınen bağlı tedbirler keçirüvi; cemiyet nizamını qoruvında fedakârlıq, cesaret ve ayat telükesi olğan şaraitte grajdanlıq ve iş borcunı yerine ketirmekte cesür ve müim areketler yapılğanı” içün tesis etile.
Vesiqağa köre, mukâfat namzetleri, Qırımnıñ rusiyeli başı Sergey Aksönov, Qırım akimiyeti reisi Vladimir Konstantinov, Qırım parlamentiniñ prezidium azaları tarafından tayin etilecek.
Ukrain Qırımınıñ zapt etilgeninden soñ, Rusiyede arbiy adamlar, siyasetçi ve “Qırım samooboronası” vekillerini “Qırım qaytaruvı içün” medallernen mukâfatlandırıp başladılar. O medalde, qaytaruv operatsiyası 2014 senesi fevral 20-nden 2014 senesi mart 18-inece keçirilgeni yazılğan.
Qırım ve Aqyar şeeri territoriyasında 2014 senesi martnıñ 16-sında yarımadanıñ statusı boyunca dünya tarafından tanılmağan referendum ötkerildi. Rusiye, onıñ neticesine esaslanıp, Qırımnı öz toprağına qoştı. Ne Ukraina, ne Avropa Birligi, ne de AQŞ referendumdaki rey berüvniñ neticelerini tanımadılar. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
