Qırım Muhtar Cumhuriyeti ve Aqyar şeeri milliy muhtariyetke çevirilmek kerek, dep saya Qırımtatar Milliy Meclisi.
Milliy Meclis temsilcileri İspaniyanıñ Ukrayinadaki elçisi Rikardo Lopes-Arandoy Hagu ile körüşüv vaqtında işğalden soñraki Ukrayinada Qırımnıñ statusına diqqat ayırdılar.
"Malüm olğanı kibi, Qırımtatar Milliy Meclisi izçenliknen qırımtatar halqınıñ noqta-i nazarını qorçalay, bu da Qırım yarımadasınıñ Ukrayinanıñ ayırılmaz parçası olmasıdır, onıñ topraqlarında yaratılğan Qırım MC ve Aqyar şeeri ise Ukrayina Anayasası tarafından belgilengen salâhiyetlerni ömürge keçirecek milliy territorial muhtariyetke çevirilmeli", - dep bildirdiler Milliy Mecliste.
Evel Ukrayina Prezidenti ofisi yolbaşçısınıñ mesleatçısı Mıhaylo Poldolâk, yarımada işğalden azat etilgen soñ Qırım muhtariyet statusından marum etile bilecegini farz etken edi.
Aprelniñ başında Ukrayina Nazirler kabineti Qırım ve Aqyar şeeriniñ İşğalden azat etilüvi ve reintegratsiyası Strategiyasınıñ yañı variantını qabul etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
