Link açıqlığı

Qırım akimiyeti yarımadada iş alıp barğan matbuat vastalarınıñ faaliyetine tsenzuranı kirsetmemek vade eteler.

Bunı bugün öz başına tayinlengen Qırım akimiyetiniñ «matbuat ve kütleviy kommunikatsiya boyunca naziri»Dmitriy Polonskiy bildirdi, dep haber ete «Tsentr jurnalistskih rassledovaniy».

«Akimiyetimizniñ olduqça açıq işiniñ tarafdarı olam. Şunıñ içün, saamıznen bağlı olğan adiseler, şübesiz, açıq-aydın olacaqtır. Biz iç bir kimsege tsenzuranı kirsetmege planlaştırmaymız. Bütün müessise ve nazirliklerge matbuat vastalarınen munasebette bulunmağa kerek, şunıñ içün tsenzuranıñ olmaycağını daa bir kere aytıp keçem», – dep añlattı Dmitriy Polonskiy.

Bunıñnen beraber «nazir» «ne sebepten «Qırım Cumhuriyetiniñ Devlet şurası» ve Qırım nazirler Şurasınıñ toplaşuvlarına matbuat vastalarınıñ episi temsilcileri kirip olamaylar» – degen sualge cevap berip olamadı. Yalıñız olarnıñ nazirligiñ «Qırım Devlet şurаsına» alâqası olmağanını ayttı.

«Cumhuriyet Devlet şurasında olıp keçken şeylernen malümat-analitik idaresi oğraşa. Anda öz matbuat-hızmeti bar, ve istegimiz olsa bilе, Devlet şurasınıñ malümat siyasetine tesir etip olamaymız. Şunıñ içün, yazıq ki, ya da bahtımızğa, bu bizim areketimizniñ saası degildir. Nazirler şurası, akimiyet icraiy organlarına kelgende ise – jurnalistler içün al-azırda iç bir mania yoqtır», – dep cevap berdi nazir.

Özüni «Qırım Cumhuriyetiniñ Devlet Şurası» dep аdlağan qanunsız Qırım parlamenti toplaşuvlarına kiriş yasaq olğan jurnalistlerniñ cedveli bardır.

İstenmez matbuat vastaları arasında «Tsentr jurnalistskih rassledovaniy» ve «Krım.Kommentarii» saytı bar.

Qırım yarımadasında çalışqan ukrain ve qırım matbuat vastaları yılnıñ soñuna qadar rusiye Federatsiyasınıñ qanunlarına köre qayd olunmğa kerektir.
XS
SM
MD
LG